धरानः धरानमा अनैतिक क्रियाकलाप गर्ने १० जनालाई प्रहरीले पक्राउ गरेको छ ।
धरान–३ माछाभौडीस्थितमा रहेको ‘लालीगुँरास होटल’ मा यौनधन्दा भइरहेको सुइँको पाएपछि प्रहरी पुगेको र उनीहरुलाई पक्राउ गरिएको इलाका प्रहरी कार्यालय धरानका प्रहरी निरीक्षक कोमल ठाकुरले जानकारी दिए । पक्राउ पर्नेहरू, धरानकै अधिकांश छन् । त्यस्तै, अन्य जिल्ला ताप्लेजुङ र भोजपुरका युवा समेत अनैतिक क्रियाकलापको आरोपमा पक्राउ छन् ।
पक्राउ पर्नेहरु २० वर्षीया दुई युवती, २६ वर्षीया युवती र ३८ वर्षीया महिला, २६ वर्षदेखि ३८ वर्षसम्मका पुरुष छन् । उनीहरु अधिकांश धरान निवासी नै हुन् भने एकजना भोजपुर, अर्काजना ताप्लेजुङका पुरुष छन् भने इटहरीकी २६ वर्षीया युवती छिन् ।
होटलमा चेकजाँच गर्ने क्रममा सो होटलको एकतल्ले भवनबाट हाम फालेर भाग्ने क्रममा लडेर एकजना युवती घाइते समेत बनेको उनले जानकारी दिए । धरान–१५ की २६ वर्षीया युवती होटलबाट भाग्ने क्रममा भवनको एकतल्लामाथिबाट हाम फालेको लड्न पुगेको र घाइते बनेको उनको भनाइ छ । उनको धरानस्थित बीपी कोइराला प्रतिष्ठानमा उपचार भइरहेको उनले जानकारी दिए । उनको अवस्था सामान्य रहेको र दाहिने हात फ्याक्चर भएको पाइएको प्रहरीले जनाएको छ ।
उनीहरूमाथि बेश्यावृत्तिसम्बन्धी मोलमोलाई गर्ने कार्यमा संलग्न रहेको अभियोगमा छ । उनका अनुसार होटलमा युवायुवती जम्मा भई यौनजन्य क्रियाकलापमा संलग्न हुने गरेको प्रहरीको दावी छ ।
सो होटलमा अनैतिक क्रियाकलाप हुने गरेको सूचनाको आधारमा प्रहरीले केही दिनदेखि निगरानी गरी विशेष सूचनाको आधारमा छापा मारेको थियो । पक्राउ परेकाहरुविरुद्ध कानुनबमोजिम आवश्यक कारवाहीका लागि अनुसन्धान चलिरहेको प्रहरीको भनाइ छ ।
पछिल्लो समय धरान तथा आसपासमा क्षेत्रमा यौनधन्दा न्यून हुने भएको प्रहरीले जनाउँदै आएको छ । तर, पनि बेलाबेलामा घटना दोहोरिने गरेका छन् । प्रहरीले कडाइ गर्न छाडे पुनः यौनधन्दा मौलाउने हुँदा जाँच भने रोकेको छैन ।
यसअघि पनि प्रहरीले विभिन्न होटलबाट यस्ता क्रियाकलापमा संलग्नहरुलाई पक्राउ गर्दै आएको छ । तर पक्राउ परेलगत्तै छुट्ने हुँदा यस्ता गतिविधि नियन्त्रण नभएको सरोकार भएकाहरु बताउँछन् । धेरै होटलले काम गर्न भनेर राख्ने तर यौनधन्दा गर्न बाध्य पार्ने गरेका छन् भने कतिपय युवती बढी पैसाको प्रलोभनमा परेर यस्तो धन्दामा फस्ने गरेको प्रहरीको अनुसन्धानले बताएको छ । प्रहरीले यस्ता क्रियाकलाप निस्तेज पार्न सक्रियताका साथ लागिपरेको जिल्ला प्रहरी कार्यालय सुनसरीका एसपी सुमनकुमार तिम्सिनाले जानकारी दिए ।