धरानः धरानमा लागूऔषधसहित दुईजना युवा पक्राउ परेका छन् ।
धरान उपमहानगरपालिका वडा न.२ स्थित वडा प्रहरी कार्यालय धरानबाट खटिएको प्रहरी गस्ती टोलीले ती युवालाई प्रमाणसहित पक्राउ गरेको हो ।
धरान उपमहानगरपालिका वडा नं.५ बस्ने १९ वर्षीय सूर्य लिम्बूको शरीर कानुन बमोजिम तलासी लिँदा उनले बोकेको बजारे झोलाभित्र लागूऔषध भेटेको इलाका प्रहरी कार्यालय धरानका प्रहरी निरीक्षक कोमल ठाकुरले जानकारी दिए ।
उनको साथबाट ट्रामोल–५०, ट्रामाडोल हाइड्रोक्लोरिड १०० ट्याब्लेट (१० पत्तामा) र नियन्त्रित औषधि स्पासपेन लेखिएको १० पत्तामा १०० ट्याब्लेट फेला परेको उनको भनाइ छ ।
उनलाई प्रारम्भिक सोधपुछ गर्दा बरामद लागूऔषध धरान–५ बस्ने निकेश लिम्बूसँग मिलेर खरिद बिक्री बितरण गर्छौ भनेर उनले पोल खोलेपछि निकेशलाई पनि पक्राउ गरिएको प्रहरीले जनाएको छ ।
निकेशको घरमा पुगी घरकोठा खानतलासी गर्दा कोठाबाट लागूऔषध ट्रामोल, ट्रामाडोल हाइड्रोक्लोरिड ३ हजार १९० ट्याब्लेट, नियन्त्रित औषधि स्पासपेन ५ सय २ ट्याब्लेट फेला परेको प्रहरीले जनाएको छ । उनीहरूमाथि थप अनुसन्धान भइरहेको प्रहरीले जनाएको छ ।