धरानः धरानका एक युवा फरार भएका छन् । ठगीको मुद्दामा यसअघि पक्राउ परेका थुनुवा धरान–१ घर भएका २५ वर्षीय धनबहादुर भुजेल इटहरीबाट फरार भएका हुन् ।
काठमाडौं लैजाँदै गरिएकाउनी शुक्रबार दिउँसो इटहरीबाट फरार भएका हुन् । इटहरीबाट दिउँसो ४ बजेतिर फरार भएको प्रहरीले जनाएको छ । तेह्रथुम प्रहरी प्रमुख डीएसपी लीलाराज लामिछानेका अनुसार भुजेलसहित तेह्रथुमको लालीगुराँस नगरपालिका–७ का ३२ वर्षीय डम्बरबहादुर लिम्बूविरुद्ध तेह्रथुमकै इलाका प्रहरी कार्यालय वसन्तपुरले ठगी मुद्दा चलाएको थियो ।
भुजेल र लिम्बू मिलेर दुइजनाको आठ लाख ५३ हजार रुपैयाँ ठगी गरेको प्रहरीको दावी छ । एक जनाको छ लाख ६७ हजार र अर्का एक जनाको एक लाख ८६ हजार रूपैयाँ ठगी गरेको अनुसन्धानबाट खुलेको छ ।
पीडितलाई पैसा बुझाएर मेलमिलाप भएपछि सरकारी वकिल कार्यालयले दुवै जनाविरुद्ध मुद्दा नचलाउने निर्णय गरेको थियो । तर, फागुन २७ गते भोजपुरबाट पक्राउ परेका ठगी मुद्दाका अभियुक्त भुजेलविरुद्धको अर्को मुद्दा काठमाडौंमा रहेको खुलेपछि उनलाई काठमाडौं लैजान प्रहरीले इटहरी पुरयाएको थियो । आरोपित भुजेललाई काठमाडौं अदालतमा उपस्थित गराउनुपर्ने भएपछि तेह्रथुमबाट प्रहरीले काठमाडौं लैजाँदै गरेको डिएसपी लामिछाने बताउँछन् ।
सई नेत्रप्रसाद बाँस्तोला र हवल्दार नवीनकुमार रायले भुजेललाई सार्वजनिक सवारी साधनमा काठमाडौं लिएर जाँदै थिए । इटहरीबाट रात्रीकालीन बसमा लैजाने तयारीमा रहेको प्रहरीलाई झुक्याएर शौचालय जान्छु भन्दै हिँडेका उनी नभेटिएको प्रहरीले जनाएको छ ।
कोशी प्रदेश प्रहरी कार्यालय विराटनगर, इलाका प्रहरी कार्यालय इटहरीलगायतका विभिन्न प्रहरी कार्यालयसँग समन्वय गरेर उनको खोजी तीब्र पारिएको प्रहरीले जनाएको छ । भुजेलविरुद्ध काठमाडौं जिल्ला अदालतमा १ लाख ९० हजार बिगो माग दाबीसहित ठगी मुद्दा दर्ता भएको प्रहरीले जनाएको छ । उनलाई अनलाइनमार्फत ठगी गरेको आरोपमा साइबर ब्यूरोले मुद्दा चलाएको र साइबर ब्यूरो बुझाउने तयारीका साथ प्रहरीले उनलाई लिएर हिँडेको थियो ।