धरानः धरानमा लागूऔषध प्रयोगकर्ता बढेसँगै प्रहरीले पनि कडाइ गर्न थालेको छ ।
यसअघि दिनहुँजसो युवायुवती पक्राउ गरिरहेको प्रहरीले ५६ वर्षीय पुरुषको साथमा लागूऔषध फेला पारेपछि बाटैबाट पक्राउ समेत गरेको छ ।
धरान उपमहानगरपालिका वडा न.८ भोटेपुलस्थित अस्थायी प्रहरी बिट बरगाछीबाट प्रहरी सहायक हवल्दार नविन श्रेष्ठको कमाण्डमा खटिएको गस्ती टोलीले शंका लागेर चेकजाँच गर्दा पैदल हिँडिरहेका यात्री धरान उपमहानगरपालिका वडा नं. ८ बस्ने ५६ वर्षीय राजु क्षेत्रीको साथबाट लागूऔषध भेटेपछि उनलाई पक्राउ गरेको प्रहरीले जनाएको छ । उनको साथबाट प्रहरीले स्पास्मो प्रोक्जोभिन प्लस लेखिएको ५० क्याप्सुल भेटेको जनाएको छ ।
यस्तै, धरान–८ बस्ने नै बस्ने २९ वर्षीय सकुल अधिकारीको साथबाट लागूऔषध नै भेटेपछि उनलाई समेत पक्राउ गरेको प्रहरीले जनाएको छ । उनको साथबाट स्पास्मो पोक्जोभिन आर एगिक लेखिएको ७२ क्याप्सुल फेला पारेको प्रहरीले जनाएको छ । उनीहरुलाई इलाका प्रहरी कार्यालय धरानमा ल्याई थप अनुसन्धान अघि बढाइएको प्रहरीले जनाएको छ ।