धरानः अन्ततः प्रधानमन्त्री केपी शर्मा ओलीले धरानवासीलाई खानेपानी उपलब्ध गराउने प्रक्रिया अघि बढेको बताएका छन् ।
प्रधानमन्त्री तथा मन्त्रिपरिषद्को कार्यालय, सिंहदरबारमा सवा ५ बजे धरान उपमहानरपालिकाका मेयर हर्कराज राई (साम्पाङ) सहितको प्रतिनिधिमण्डलसँगको भेटमा प्रधानमन्त्री ओलीले धरानवासीले खानेपानी पाउने बताएका हुन् ।
कोशीको पानी धरानबासीलाई उपलब्ध गराउन माग गर्दै मेयर साम्पाङसहित धरान उपमहानगरपालिकाका प्रशासकीय अधिकृत अम्विका चौलागाईं, धरान खानेपानी बोर्डका निर्देशक राजु पोख्रेल, वरिष्ठ इन्जिनियर राजु पोख्रेलसहितको टोली सिंहदरबारको विभिन्न मन्त्रालय चहारिरहेको छ । ‘करिब सवा ५ बजे प्रधानमन्त्रीसँग भेट भएको छ’, निर्देशक पोख्रेलले भने, ‘प्रधानमन्त्री ज्यूले कोशीबाट पानी ल्याउने विषयमा नै प्रक्रिया अघि बढिसकेको बताउनुभएको छ ।’

धरानको खानेपानीको समस्यालाई दर्शाउँदै प्रधानमन्त्री तथा मन्त्रिपरिषद्को कार्यालय, सिंहदरबार पुगेर उनले समाधानको लागि प्रधानमन्त्रीको ध्यानाकर्षण गराएका हुन् ।
भेटमा प्रधानमन्त्री ओलीले भने, ‘धरानवासीले खानेपानी पिउन पाउनुपर्छ । यो प्रक्रिया आजैबाट अघि बढ्यो । यसका लागि संघीय सरकारले बजेटको प्रबन्धलगायत अन्य विषयमा आवश्यक सहजीकरण गर्नेछ । यो सन्देश धरानवासीलाई सुनाइदिनुहोला’, प्रधानमन्त्री ओलीले भने ।
मेयर साम्पाङले यसअघि स्रोत सुनिश्चितताका लागि अर्थ मन्त्रालयलाई आग्रह गरेको जानकारी गराएका थिए । प्रधानमन्त्री ओलीले धरानको फोहर व्यवस्थापनका लागि परम्परागत नभई आधुनिक प्रविधियुक्त ‘ल्याण्डफिल्डसाइट’ बनाउनुपर्नेमा जोड दिएका थिए ।
यसअघि रित्तो गाग्री लिएर सिंहदरबार छिर्न खोजेका उनले खानेपानी मन्त्रीलाई भेटेर फर्किएका थिए । उता मेयर साम्पाङले प्रमुख मानवीय आवश्यकता खानेपानी भएको बताएका छन् । प्रधानमन्त्रीसँगको भेटपछि पत्रकारहरूसँग कुरा गर्दै उनले यस्तो बताएका हुन् ।
उनले धरानको जनताका लागि मुख्य समस्या खानेपानी रहेको बताए । उनले सडक निर्माण दोस्रो प्राथमिकतामा राख्दै धुलो बाटोमा हिँड्न सकिने तर पानीबिना जीवन नचल्ने बताए । धरानको खानेपानी समस्याका बारेमा प्रधानमन्त्रीसँग भएको कुराकानी सकारात्मक भएको जानकारी दिए । खानेपानी व्यवस्थापनका लागि करिब पाँच अर्ब लाग्ने र बजेटमार्फत स्रोत व्यवस्था गर्ने प्रधानमन्त्रीको आश्वासन पाएको उनको भनाइ छ ।
प्रधानमन्त्रीको आश्वासनमा शंका गर्न नहुने तर बजेटले सम्बोधन नगरेसम्म विश्वास नलाग्ने उनको भनाइ छ । उनले धरानमा आफूले तीन हजार धारा थपिसकेको तर सहरीकरण बढ्दा माग पनि उतिकै बढेको उल्लेख गरे ।
मेयर साम्पाङले जीवन रहेसम्म समस्याले नछोड्ने भन्दै मुख्य समस्या समाधान पहिलो प्राथमिकतामा राख्नुपर्ने बताए । काठमाडौंवासीले नियमित मेलम्चीको पानी खान नपाएको भन्ने पत्रकारहरूको जिज्ञासामा उनले श्रमदान गर्न आउन पर्‍यो कि भन्दै व्यङ्ग्य गरे ।