धरानः धरानमा सामुदायिक जंगलमा एक महिलाको शव फेला परेको छ ।
धरान उपमहानगरपालिका–६ पाँचकन्या सामुदायिक वनमा नामथर, वतन नखुलेको शेवारिसे महिलाको शव फेला परेको प्रहरीले जनाएको छ ।
शवको पहिचान हुन सकेको छैन । सोमबार शव जंगलमा रहेको स्थानीयले थाहा पाएका थिए । स्थानीयले प्रहरीलाई खबर गरेपछि अनुसन्धानका लागि प्रहरी कार्यालयबाट टोली खटिएको थियो ।
शव अत्यधिक सडिनसकेकोले पहिचान गर्न सकिने अवस्था रहेको रशवसँगै फेला परेका लत्ता–कपडा, घडीसमेत थप अनुसन्धानका लागि संकलन गरिएको प्रहरीले जनाएको छ । प्रहरीको प्रारम्भिक अनुसन्धानअनुसार ती महिलाको हत्या भएको हुनसक्ने आशंका गरिएकाले विभिन्न कोणबाट अनुसन्धान थालिएको प्रहरीले जनाएको छ । अर्धनग्न अवस्थामा रहेकाले घटना हत्या हो वा आत्महत्या हो भन्ने हालसम्म खुल्न नसकेको प्रहरीले जनाएको छ । यस विषयमा प्रहरीले अनुसन्धान सुरु गरेको छ । शवलाई धरानस्थित बीपी कोइराला स्वास्थ्य विज्ञान प्रतिष्ठानको मर्चरीमा राखिएको छ । मंगोलियन वर्णकी, नाकमा नत्था लगाएको, कानमा टप लगाएकी, माथि सेतो सर्ट, तल निलो जिन्सको पाइन्ट लगाएकी, हातमा घडी र सेतो बाला लगकी, सेतो खैरो कलरको जुत्ता लगाएकी महिलाको शव भेटिएको जिल्ला प्रहरी कार्यालय सुनसरीले जनाएको छ । प्रहरीले शव पहिचानको लागि सम्पर्क नम्बर (जि.प्र.का. सुनसरीः– ९८५२०९०१२७, ९८५२०४१०६४, १०० इ.प्र.का. धरानः– ०२५–५७४५५५, ९८५२०९०१२६) समेत उपलब्ध गराएको छ ।