धरानः धरानबाट भोजपुर जाँदै गरेको बस दुर्घटनामा परी चालकको समेत मृत्यु भएको छ ।
मृत्यु हुनेमा धरान–१३ का ५१ वर्षीय चालक रुद्र तामाङको धरानमै उपचारका क्रममा मृत्यु भएको प्रहरीले जनाएको छ । धरानबाट हिँडेको बस धनकुटामा पल्टिएपछि एकजनाको मृत्यु भएको थियो भने उनीसँगै १३ जनाको घाइते बनेका थिए । घाइतेमध्ये उनी र अन्य तीनजना गम्भीर घाइते समेत बनेका थिए ।
उनको उपचारका क्रममा धरानस्थित बीपी कोइराला स्वास्थ्य प्रतिष्ठान धरानमा सोमबार राति साढे ७ बजे मृत्यु भएको प्रहरीले जनाएको छ ।
यसअघि धनकुटामा उपचारका क्रममा धनकुटा–६ की कृष्णकुमारी राई भुजेलको मृत्यु भएको थियो । धरानबाट भोजपुरतर्फ हिँडेको को१ख २१७७ नम्बरको सार्वजनिक यात्रुवाहक सडकबाट करिब ५० मिटर तल खस्दा एकजनाको मृत्यु भएको थियो भने १३ जना घाइते बनेका थिए ।
कृष्णकुमारीको धनकुटा जिल्ला अस्पतालमा उपचारका क्रममा मृत्यु भएको थियो । अन्य घाइतेहरुको जिल्ला अस्पताल तथा धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ ।