धरानः नेपाल आदिवासी जनजाति पत्रकार महासंघ (फोनिज) प्रदेश नम्बर १ कार्य समितिले दुईजना पत्रकारहरुलाई जनही १० हजार नगद बराबरले सम्मान गरेको छ ।
सम्मान फोनिजको २६ औं स्थापना दिवसको अवसरमा धरान–२ स्थित एचके मेलोडी क्लबमा आयोजित कार्यक्रममा सम्मान गरिएको हो । सम्मानित हुने पत्रकारहरुमा भोजपुर कर्मथलो भएकी र २०७० सालदेखि निरन्तर पत्रकारिता गर्दै आएकी भोजपुरकी शारदा तामाङ र झापा कर्मथलो बनाएका र २०५७ सालदेखि निरन्तर पत्रकारिता गर्दै आएका दमक–१ निवासी दिलकुमार लावती रहेका छन् ।
सम्मानित दुवैजनालाई प्रमुख अतिथि एवं साँगुरीगढी गाउँपालिका धनकुटाका अध्यक्ष जीतेन्द्र रुम्दाली राई, पुरस्कार छनौट समितिका संयोजक सन्तवीर लामा, फोनिज प्रदेश १ का अध्यक्ष विजयबोध लावती र अग्रजद्वय पत्रकार हर्ष सुब्बा, सञ्जयसन्तोषी राई समेतले सम्मान पत्र र दोसल्ला ओढाएर सम्मान गरेका थिए । सोही कार्यक्रममा फोनिज प्रदेश– १ नयाँ निर्वाचित कार्य समितिका पदाधिकारीहरुलाई शुभकामना पत्रले पनि सम्मान गरिएको थियो ।
तस्वीरहरूः लक्ष्मण थापा/हाम्रो कोशी आवाज