धरानः धरानको चन्द्रपुरमा जात्रा उत्सव शुरु भएको छ । धरान–३ वडा कार्यालयको विशेष सहयोगमा तीनदिने चन्द्रपुर जात्रा उत्सव शुरु भएको हो । जात्रा उत्सवको पहिलो दिन धीमेबाजा प्रतियोगिता गरेर सम्पन्न भएको छ ।
धीमेबाजा प्रतियोगितामा ६ जना समूह प्रतिस्पर्धीहरुमा नेवाः साँस्कृतिक कलापुञ्ज धरान–१० प्रथम, नेवाः देय दबू धरान–१५ दोस्रो र नेवाः थपु गुठी धरान–८ तेस्रो भएको छ र उनीहरुलाई प्रोत्साहन स्वरुप क्रमशः नगद १० हजार, ७ हजार र ५ हजारले पुरस्कारले सम्मान गरिएको थियो । धीमेबाजाका प्रतियोगिताका निर्णायकहरुमा नरेश शाक्य, गगनमान श्रेष्ठ र आयुष शाक्य रहेका थिए ।
नेवाः संस्कृतिको मूल थलो मानिने धरान–३ स्थित ऐतिहासिक चन्द्रपुर बजार क्षेत्र शुक्रबारदेखि तीनदिने भव्य चन्द्रपुर जात्रा सांस्कृतिक जात्रा भएको हो । कोशी प्रदेशकी सांसद यशोदा कायस्थको प्रमुख आतिथ्यमा सम्पन्न उद्घाटन कार्यक्रममा जात्राले बजारलाई सांस्कृतिक उमंगले छरिदिएको छ ।
राणाकालीन प्रधानमन्त्री चन्द्रशमशेरले स्थापना गरेको चन्द्रपुर बजार नेवारी इतिहास, परम्परा र संस्कृतिको महत्वपूर्ण केन्द्रविन्दु मानिन्छ । यसको संरक्षण र प्रवद्र्धनका लागि धरान नगरपालिका–३ वडाको विशेष पहलमा जात्राको आयोजना गरिएको हो ।
धिमेबाजाको मधुर तालसँगै मौलिक नेवारी बाजागाजाको प्रस्तुति र धिमो बाजा प्रतियोगिता सम्पन्न भएको हो । प्रतियोगितामा धरान–८ को थपु गुठी, धरान–१० को नेवाःसांस्कृतिक उत्थान मञ्च, धरान–१० कै नेवा ःसांस्कृतिक कला पुञ्ज, नेवाः देय् दबु धरान १५, नेःवा देय दबु धरान ७ र १०, नेःवा मिसा दबु र नेवार एकता समाजको सहभागिता रहेको छ ।
जात्राको दोस्रो दिन शनिबार कृष्ण जन्माष्टमी उत्सव, बृहत लाखे प्रदर्शन र अन्य जातीय सांस्कृतिक कार्यक्रम आयोजना भएको थियो । भोलि अर्थात् भाद्र १ गते मौलिक सांस्कृतिक झाँकीसहितको कृष्ण रथयात्रा निकालिने र रात्रीकालीन लाखे बिसर्जन गरेर जात्राको समापन गरिने संयोजक अनिल मास्केले जानकारी दिए ।
कार्यक्रममा नेवारी संस्कृति र चन्द्रबजारको विकासको लागि योगदान दिएका समाजसेवी कृष्णप्रसाद श्रेष्ठलाई सम्मान गरिएको थियो । कार्यक्रममा सांसद कायस्थ, धरान–३ का वडा सदस्य मिङमा भोटे, वडा नम्बर–३ कै पूर्व वडा सदस्य विकास बनेपालीले बोलेका थिए । कार्यक्रम धरान–३ का वडाध्यक्ष विद्या शाक्यको अध्यक्षतामा सम्पन्न भएको थियो भने कार्यक्रम सञ्चालन अमृत श्रेष्ठ आचार्जुले गरेका थिए ।
तस्वीरहरूः लक्ष्मण थापा