धरानः सुनसरीको झुम्का कारागारमा दुईजना कैदीको मृत्यु भएको छ । धरान–१० का २४ वर्षीय सागर राई र सुनसरीको गढी गाउँपालिका–६ का ४८ वर्षीय रामदेव उराँवको मृत्यु भएको प्रहरीले जनाएको छ ।
राई लागूऔषध मुद्दामा पुर्पक्षका लागि गत वैशाखदेखि कारागारमा थुनामा थिए भने उराँव कर्तव्य ज्यान मुद्दामा २५ वर्षको सजाय भुक्तान गरिरहेका थिए ।
दुवैलाई श्वासप्रश्वासमा समस्या देखिएपछि धरानस्थित बीपी कोइराला स्वास्थ्य विज्ञान प्रतिष्ठानमा भर्ना गरिएकोमा उपचारकै क्रममा मृत्यु भएको सुनसरीका प्रमुख जिल्ला अधिकारी धर्मेन्द्रकुमार मिश्रले जानकारी दिए ।
राईको मंगलबार बिहान मृत्यु भएको कारागार प्रशासनले जनाएको छ भने उराँवको सोमबार दिउँसो मृत्यु भएको प्रहरीले जनाएको छ ।
प्रमुख जिल्ला अधिकारी मिश्रले दुवैजना कैदी दीर्घरोगी रहेको बताएका छन् । लागूऔषध मुद्दामा पुर्पक्ष कैदमा रहेका राईलाई बान्ता हुने र शरीर नचल्ने समस्या आएपछि बीपी प्रतिष्ठानमा भर्ना गरिएको थियो । मृतक दुवै जनाको शव आफन्तले बुझेर लगेको जनाइएको छ ।