धरानः धरानमा अटोमा ठूलो परिमाणमा लागूऔषध फेला परेपछि दुईजना समातिएका छन् ।
धरान-१७ पटनाली हरिण खोलाबाट उनीहरू पक्राउ परेका हुन् । लागूऔषध ओसार पसार भइरहेको छ भन्ने विशेष सूचनाको आधारमा अस्थायी प्रहरी चौकी रेल्वेबाट खटिएको प्रहरी टोलीले ऐ. स्थित धरानबाट चतरातर्फ जाँदै गरेको प्र.१–०५–००१ ह ०१४७ नम्बरको अटोलाई रोकेर चेकजाँच गर्दा लागूऔषध फेला परेको इलाका प्रहरी कार्यालय धरानले जनाएको छ ।
कानुन बमोजिम चेकजाँच गर्दा सो अटोमा सवार जिल्ला उदयपुर त्रियुगा नगरपालिका वडा नं. ७ बस्ने १९ वर्षीय दीपक मगरले कालो झोलामा लुकाइछिपाई ल्याउँदै गरेको अवस्थामा लागूऔषध ट्रामाडोल–३९९० ट्याब्लेट र डिकोलिक–३९९० ट्याब्लेट फेला परेको थियो । लागूऔषध र अटोसहित निज दीपक मगर र अटो चालक वडा नं. १० बस्ने ३३ वर्षीय फिरोज मोहमदलाई समेत नियन्त्रणमा लिई इलाका प्रहरी कार्यालय धरानमा ल्याई थप अनुसन्धान भइरहेको प्रहरीले जनाएको छ ।