धरानः मोटरसाइकल दुर्घटनामा परेर पत्रकार रणध्वज लोहार (विक) गम्भीर घाइते भएका छन् ।
मंगलबार राति साढे ९ बजे मोटरसाइकल दुर्घटना हुँदा उनी घाइते भएको प्रहरीले जनाएको छ । आफ्नो नियमित काम सकेर घर फर्किने क्रममा धरान–६ पानबारीस्थित मदन भण्डारी राजमार्गको छतिवन चोकमा जाँदै गरेको को२१प ५५८५ नम्बरको सुजुकी कम्पनीको मोटरसाइकल आफैं अनियन्त्रित भई दुर्घटना भएको थियो । धरान–६ घोपाली टोल बस्ने ४५ वर्षीय उनको टाउको र शरीरको विभिन्न भागमा चोट लागेको प्रहरीले जनाएको छ ।
उनको हाल धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको छ । उनको अवस्था गम्भीर रहेको र अस्पतालको आइसियु कक्षमा उपचार भइरहेको छ । उनको शीघ्र स्वास्थ्य लाभको कामना ।