धरानः धरानमा लागूऔषध गाँजासहित युवा पक्राउ परेका छन् ।
धरान उपमहानगरपालिका वडा नं. २० कोकाहा खोलामा लागूऔषध ओसारपसार भइरहेको छ भन्ने विशेष सूचनाको आधारमा इलाका प्रहरी कार्यालय धरानबाट खटिएको प्रहरी टोली त्यहाँ पुगेको थियो ।
धनकुटाबाट धरानतर्फ आउँदै गरेको प्र.१–०२–०५३ प ९९८२ नम्बरको मोटरसाइकललाई रोकी कानुन बमोजिम चेकजाँच गर्दा मोटरसाइकल चालक धनकुटा सहिदभुमी गाउँपालिका वडा नं. १ बस्ने वर्ष २३ को सिद्वार्थ राईले बोकेको कालो झोलामा प्याक गरिएको अवस्थामा गाँजा फेला परेको इलाका प्रहरी कार्यालय धरानका डिएसी भीषणबाबु राईले जानकारी दिए ।
ती युवाले बोकेको झोलामा ११ केजी गाँजा फेला परेको प्रहरीले जनाएको छ । सो गाँजा र मोटरसाइकलसहित नियन्त्रणमा लिई इलाका प्रहरी कार्यालय धरानमा ल्याई थप अनुसन्धान भइरहेको प्रहरीले जनाएको छ ।