धरानः धरानमा दुर्घटना हुँदा एकजनाको मृत्यु भएको छ । तीब्र गतिको मोटरसाइकल सडक किनारमा रोकिएको ट्रकमा ठोक्किँदा मोटरसाइकल चालकको मृत्यु भएको छ ।
धरान-८ तीनकुनेस्थित कोशी लोकमार्गमा धरानबाट इटहरीतर्फ जाँदै गरेको प्र१–०३–००१प १३२४ नम्बरको २०० सिसीको मोटरसाइकलले प्र १–०२–००१ ख ८७५७ नम्बरको सडकको साइडमा रोकिराखेको ट्रकमा पछाडिबाट ठक्कर दिई सवारी दुर्घटना हुँदा एकजनाको मृत्यु भएको प्रहरीले जनाएको छ ।
मृत्यु हुनेमा इटहरी–४ बस्ने २५ वर्षीय मन्जिल लिम्बू रहेको प्रहरीले जनाएको छ । उनको हात अनुहारमा गम्भीर चोट लागेको र बोल्न नसक्ने अवस्थामा उद्धार गरेर धरानस्थित बीपी प्रतिष्ठानमा उपचारका लागि भर्ना गरिएको थियो । उनको उपचारका क्रममा मृत्यु भएको प्रहरीले जनाएको छ ।
मोटरसाइकल पछाडि सवार धरान–५ बस्ने ३२ वर्षीय अमित राईको टाउकोमा चोट लागेको प्रहरीले जनाएको छ । दुर्घटनामा संलग्न ट्रकका चालक, तेह्रथुम फेदाप गाउँपालिका–२ का २७ वर्षीय गणेश भण्डारीलाई प्रहरीले नियन्त्रणमा लिएको छ । मृतक लिम्बूको शव प्रतिष्ठानको शव गृहमा राखिएको प्रहरीले जनाएको छ ।