धरानः धरानमा प्रहरीले दिनहुँजसो लागूऔषध भेट्न थालेको छ ।
यसैबीच धरान उपमहानगरपालिका वडा नं. १६ पानी ट्याङ्कीमा लागूऔषध कारोबार भइरहेको छ भन्ने प्राप्त सूचनाको आधारमा अस्थायी प्रहरी पोष्ट जोर सखुवा धरानबाट खटिएको प्रहरी टोलीले घरको कोठाबाट लागूऔषध बरामद गरेको छ ।
लागूऔषधसहित धरान–१६ का ३० वर्षीय रितिक थामीको कोठामा खानतलासी तथा चेकजांच गर्दा उनको कोठाबाट ट्रामाडोल ६ सय १० क्याप्सुल र स्पास्पेन ६ सय १० ट्याब्लेट गरी जम्मा १२ सय २० ट्याब्लेट, क्याप्सुल फेला परेको थियो । उनीसँगै उनको कोठामा सँगै रहेको धरान–१६ कै ३० वर्षीय हेम भुजेललाई पक्राउ गरेको इलाका प्रहरी कार्यालय धरानका डिएसपी भीषणबाबु राईले जानकारी दिए । उनीहरुमाथि थप अनुसन्धान भइरहेको प्रहरीले जनाएको छ ।