धरानः धरानमा पटके सवारी कर असुलीमा ठेकदारको मनपरी गर्ने गरेको गुनासो बढ्दो छ । उनीहरुले सवारी साधनहरुबाट मनपरी कर असुली गरिरहेको सवारी सञ्चालकहरुको गुनासो छ। सवारी साधनसँग मनपरी रुपमा १००, २०० लिने गरेको गरेको सानु पूर्वछानेले गुनासो गरे । यसरी रकम असुल्नेलाई कारवाही नभए यातायात चालकले भोटे ताल्चा लगाउन आइपुग्ने उनले बताएका छन् ।
राजमार्ग तथा सहायक राजमार्गहरुमा गैरकानुनीरुपमा गाडी रोकेर जर्बजस्ती कर असुली गरिरहेको हो ।
ऐनविपरीत भइरहेको पटके सवारी कर बन्द गराउन पहल गरिदिन पनि उनले आग्रह गरेका छन् । प्रायः सबै नगरपालिका, गाउँपालिकाहरुले राजमार्ग र सहायक राजमार्गहरुमा ठेक्का लगाएर सबै सवारीसाधनहरुसँग पटकै पिच्छे रकम असुली गरिरहेको उनले बताए ।
कानुन पालना गराउनुपर्ने स्थानीय सरकार आफैले राजमार्गहरुमा ढाट वा गुम्ती राखेर जर्बजस्ती गाडी रोकेर कर असुली गरिरहेकोमा उनको आपत्ति छ । उनले सवारीसाधनले दैनिक, मासिक एवं बार्षिक लाखौं रुपैया सवारीसाधनले तिर्नुपर्ने बाध्यता रहेको पनि बताए । कानुनमा एक पालिकामा सवारी दर्ता तथा बार्षिक सवारी कर लिएपछि अर्को पालिकाले त्यस्तो सवारी दर्ता तथा बार्षिक सवारी कर लिन नपाउने व्यवस्था गरेको छ ।
पटके करकोरुपमा गैरकानुनी कर असुलीले गर्दा व्यवसाय नै धरासायी भएर आर्थिक व्ययभार परिरहेको उनको गुनासो छ । कोशी प्रदेशका ठाउँठाउँमा ढाट राखेर पटके कर असुल्ने क्रम अझै रोकिएको छैन । जबरजस्ती लिइने पटके करका कारण यातायात व्यवसायी हैरानीमा परेका छन् । सरकारकै निर्देशनविपरीत स्थानीय तहले कोशीका १४ वटै जिल्लामा पटके कर असुलिरहेका छन् । विशेष गरेर राजमार्गमा पटके कर लिने गरिएको छ ।
गृह मन्त्रालयले ७७ वटै जिल्ला प्रशासन कार्यालयलाई पटके कर रोक्न लिखित निर्देशन दिएको थियो। तर, स्थानीय सरकारसामु प्रशासनको केही लागेन । प्रशासनले जथाभावी कर नअसुल्न भने पनि स्थानीय तहले अटेर गरिरहेका छन् । स्थानीय तहहरुले निजी, सार्वजनिक, ढुवानी तथा विदेशी पर्यटक चढ्ने यातायातका साधनलाई जबरजस्ती रोकेर कर उठाइरहेका छन् ।