धरानः श्रम संस्कृति पार्टीका अध्यक्ष हर्क साम्पाङले आगामी स्थानीय चुनावभन्दा एक वर्षअघि नै धरान उपमहानगरपालिकाको मेयर उम्मेदवार घोषणा गरेका छन् ।
उनले सामाजिक सञ्जालमार्फत धनबहादुर राईलाई उम्मेदवार बनाउने बताएका हुन् । धरान उपमेयरको मेयरमा यसअघि स्वतन्त्र उठेर जितेका साम्पाङले आफ्नो लिगेसीलाई निरन्तरता दिन चाहेका छन् ।
उनले लेखेका छन्, ‘मैले धेरै सोचेँ, जनमत बुझेँ अनि मेरो पदचापलाई पछ्याउने धन ब. राई नै देखेँ !’
धनबहादुर एमाले छोडेर श्रम संस्कृति पार्टीमा आएका हुन् । धरानको ४ नम्बर वडामा एमालेबाट वडाध्यक्ष जितेका उनी साम्पाङसँग नजिकिएका थिए । उनी मेयर साम्पाङले चलाएको श्रमदानमा सहभागी भएपछि पदबाट बर्खास्त गर्न नेकपा (एमाले) धरानले सिफारिस गरेको थियो । उनी यसअघि कांग्रेस, माओवादी, एमाले हुँदै श्रम संस्कृति पार्टीमा आएका हुन् । उनलाई तरमाराको आरोप समेत लाग्दै आएको छ । पदको लागि पार्टी फेरिरहनेमा उनी पनि पर्छन् भनेर उनका निकस्टहरुले नै भन्ने गरेका छन् ।
साम्पाङले मेयरका अर्का आकांक्षी निना चन्द्रलाई प्रदेशको मन्त्री बनाइदिने आश्वासन दिएका छन् ।
‘आजदेखि मेयरको उम्मेदवार विषय टुंगियो,’ उनले लेखेका छन् ।
उनले सुरुदेखि नै स्वतन्त्रबाट मेयर बनेका साम्पाङ लाई सघाउँदै आएका थिए । धरान कार्यपालिकामा उनी साम्पाङलाई साथ दिने एक्ला वडाध्यक्ष मानिन्थे ।
साम्पाङले श्रम संस्कृति पार्टी गठन गरेपछि उनी गत फागुन १६ गते उक्त पार्टीमा प्रवेश गरेका थिए । पार्टीले मेयरको उम्मेदवार घोषणा गरेपछि राईले पार्टी अध्यक्ष हर्क साम्पाङलाई धन्यवाद दिएका छन् । उनले भने, ‘स्थानीय तह र प्रदेशको चुनाव नजिकिएको बेला हाम्रो पार्टीका अध्यक्ष माननीय हर्कराज साम्पाङ ज्यूले मेयरको उम्मेदवारमा चयन गर्नुभयो । उहाँलाई धेरै धेरै धन्यवाद दिन चाहन्छु ।’
श्रम संस्कृति पार्टीबाट धरानको मेयरका लागि धनबहादुरसहित दिनेश राई, निनाचन्द्र राई आकाङ्क्षी थिए । तर, पार्टीले राईको नाममा सहमति जुटाएको हो । यस्तै, श्रम संस्कृति पार्टीले भर्खरै पार्टी प्रवेश गरेका पूर्वमन्त्री सुदन किरातीलाई कोशी प्रदेशको प्रस्तावित मुख्यमन्त्रीका रूपमा अगाडि सार्ने तयारी गरिसकेको छ ।