धरानः धरानबाट ब्राउन सुगर र लागूऔषधसहित पक्राउ पर्ने क्रम जारी छ ।
धरान उपमहानगरपालिका वडा नं. १७ घोपाचौकमा इलाका प्रहरी कार्यालय धरान र अस्थाई प्रहरी चौकी रेल्वे धरानबाट संयुक्त रूपमा खटिएको प्रहरी टोलीले धरान–८ बस्ने २५ वर्षीय प्रवेश राई र ३० वर्षीय मनोज तामाङलाई पक्राउ गरिएको इलाका प्रहरी कार्यालय धरानले जनाएको छ ।
चेकजाँच गर्दा निजहरू मध्ये मनोज तामाङको साथबाट लागूऔषध ब्राउन सुगर १.४६ ग्राम फेला परेको थियो । लागूऔषधसहित नियन्त्रणमा लिइएका उनीहरुमाथि इलाका प्रहरी कार्यालय धरानमा ल्याई थप अनुसन्धान भइरहेको इलाका प्रहरी कार्यालय धरानका डिएसपी भीषणबाबु राईले जानकारी दिए ।
यस्तै, इनरुवामा पैदल हिँडिरहेका धरान उपमहानगरपालिका वडा नं. १७ बस्ने वर्ष ३५ को अमित राईलाई चेकजाँच गर्दा निजको साथबाट ब्राउनसुगर ५.८६ ग्राम फेला परेपछि उनी पनि पक्राउ परेका छन् ।
सुनसरीको इनरूवा नगरपालिका वडा नं. ४ बसचौकमा अस्थायी प्रहरी पोष्ट इनरुवा बसपार्क र जिल्ला प्रहरी कार्यालय सुनसरीबाट संयुक्तरुपमा खटिएको प्रहरी टोलीले पूर्व–पश्चिम लोकमार्गमा पश्चिमबाट पूर्वतर्फ आउँदै गरेका उनलाई लागूऔषधसहित पक्राउ गरी जिल्ला प्रहरी कार्यालय सुनसरी ल्याई थप अनुसन्धान गर्ने कार्य भइरहेको प्रहरीले जनाएको छ ।