धरानः धरानतर्फ गाँजा बोकेर आउँदै गरेको मिनी ट्रक र मोटरसाइकलसहित प्रहरीले दुईजनालाई पक्राउ गरेको छ । चलाखी गरेर बाहिर आलु, भित्र गाँजा लगाएर आउँदै गरेको ती सवारीसाधनसहित दुईजना पक्राउ गरेको प्रहरीले जनाएको छ ।
ट्रकको ढलामा आलुको बोराले छोपेर ल्याउँदै गरेको अवस्थामा ७७५ केजी गाँजा भेटिएपछि दुईजनालाई पक्राउ गरिएको इलाका प्रहरी कार्यालय भेडेटारले जनाएको छ । प्रहरी टोलीले साँगुरीगढी गाउँपालिका वडा नं. ६ कोलबोटेमा सवारी जाँच गर्ने क्रममा धनकुटाबाट धरानतर्फ आउँदै गरेको को१ख ४६३५ नम्बरको मिनी ट्रक रोकी खानतलासी गर्दा सो गाँजा फेला पारेको हो ।
२५ वटा प्याकेटमा प्रतिप्याकेट ३१ किलोग्रामका दरले गाँजा ८७५ किलोग्रामी गाँजा लोड गरिएको अवस्थामा बरामद भएको जिल्ला प्रहरी प्रमुख प्रहरी उपरीक्षक नारायण रञ्जितकारले जानकारी दिएका छन् ।
घटनामा ट्रक चालक धनकुटाको पाख्रीबास नगरपालिका–१ स्थायी घर भई हाल इटहरी उपमहानगरपालिका–१ आँपगाछी बस्दै आएका परीक्षण कुँवर पक्राउ परेका छन् ।
यस्तै, साँगुरीगढी गाउँपालिका–७ लुम्फाजुङबाट बा६४प १४३५ नम्बरको मोटरसाइकलमा ल्याइँदै गरेको २० किलोग्राम गाँजासहित चालक विशेष राईलाई पनि प्रहरीले पक्राउ गरेको छ ।
प्रहरीका अनुसार सवारी जाँचका क्रममा गाँजा बरामद भएपछि प्रहरीले घटनामा संलग्न व्यक्तिहरूमाथि थप अनुसन्धान अघि बढाएको छ । धनकुटाबाटै ल्याउँदै गरेको गाँजा बरामद भएको हो । धनकुटामा बढीजसो गाँजा उत्पादन हुने गरेको छ ।
हाम्रो कोशी आवाज
