धरानः धरानस्थित बीपी कोइराला स्वास्थ्य विज्ञान प्रतिष्ठानको उपकुलपतिमा प्रा.डा. स्मृति कार्की नियुक्त भएकी छन् ।
प्रतिष्ठानले इतिहासमै पहिलो महिला उपकुलपति पाएको छ ।
स्वास्थ्य तथा खाद्य स्वच्छता मन्त्रालयअन्तर्गत प्रतिष्ठानका कुलपति समेत रहेका प्रधानमन्त्री बालेन्द्र शाहले उनलाई नियुक्त गरेका हुन् । उपकुलपति पदमा सिफारिस समितिले गरेको सिफारिस अनुसार उपकुलपति नियुक्त भएकी हुन् ।
उपकुलपति नियुक्तिका लागि सरकारले गठन गरेको ‘छनोट तथा सिफारिस समिति’ ले उपकुलतिका लागि जेठ ४ गते सूचना प्रकाशन गर्दै आवेदन माग गरेको थियो । जसमा प्रतिष्ठानबाट १६ जनाले आवेदन दिएका थिए । १६ जनामध्ये दुईजनाको नाम नै आएन भने १४ जनाको नाम पहिलोपटक सार्वजनिक भएको थियो । यस्तै, दोस्रोपटक ७ जना नाम आउँदा उनको पनि नाम परेको थियो ।
उनीसँगै प्रा.डा. गुरुप्रसाद खनाल, प्रा.डा. शिवेन्द्र झा, प्रा.डा. राजेश नेपाल, प्रा.डा. प्रल्हाद कार्की, प्रा.डा. गौरीशंकर शाह, प्रा.डा. पशुपति चौधरीको नाम थियो ।
धरानको बीपी प्रतिष्ठानमै पढेर, जागिर खाएर उपकुलपति
विराटनगर निवासी प्रा.डा. कार्की प्रतिष्ठानमा कार्यरत् प्याथोलोजिष्ट हुन् । प्याथोलोजी विभागको प्रोफेसर पदमा रही उनले २५ वर्ष काम गरेकी थिइन् । प्रतिष्ठानमै पढेर हाउस अफिसर हुँदै उनी अहिले उपकुलपतिसम्म भएकी हुन् ।
प्याथोलोजीमा एमबी गरेकी उनले हाउस अफिसर, एमडी, एसआर, एसिस्टेन्ट, एशोसिएट, एडिसनल हुँदै प्रोफसर, विभागको हेड, कास मेम्बर हुँदै उनी अहिले प्रतिष्ठानकै उपकुलपति भएकी हुन् ।