धरानः राष्ट्रिय स्वतन्त्र पार्टी (रास्वपा) धरान उपमहानगरपालिका ८ नं. वडा समितिले वृक्षारोपण कार्यक्रम सम्पन्न गरेको छ ।
वडा समितिको आयोजनामा स्थानीय हिमाली सामुदायिक वन फुटबल मैदान क्षेत्रमा पहिलो चरणअन्तर्गतको वृक्षारोपण कार्यक्रम भव्यताका साथ सम्पन्न भएको हो । रास्वपा धरान उपमहानगर समितिका उपसभापति राम कार्कीको प्रमुख आतिथ्यतामा कार्यक्रम सम्पन्न भएको थियो । त्यस्तै, कार्यक्रममा संगठन विभाग प्रमुख सन्दीप शाक्य, नगर कोषाध्यक्ष ठंगबहादुर राईको विशेष उपस्थिति र ९ नं. वडा सभापति सुधिर कटुवाललगायतको उपस्थितिमा सम्पन्न भएको थियो ।
धरान ८ नं. वडाका कार्यवाहक सभापति शिव तामाङको सभापतित्वमा सम्पन्न सो कार्यक्रमको संयोजन सनम थापाले गरेका थिए ।
पहिलो चरणको यस कार्यक्रममा वातावरण र मानव स्वास्थ्यका लागि फलदायी हुने विभिन्न प्रजातिका बिरुवाहरू रोपिएका छन् । वडा सदस्य विश्वराम कार्कीका अनुसार तेजपाता, अम्बा, जामुन, फडिर, चिउरीलगायतका बोटबिरुवाहरू रोपिएको छ । यस वृक्षारोपण अभियानलाई आगामी शनिबार दोस्रो चरणअन्तर्गत पनि विभिन्न प्रजातिका बिरुवाहरू रोपण गर्ने तयारी भइरहेको वडा सदस्य प्रकाश भुजेलले जानकारी दिए ।
रास्वपाले राजनीतिक गतिविधि सँगसँगै सामाजिक र वातावरणीय उत्तरदायित्व बहन गर्दै धरानमा रचनात्मक कार्यहरूलाई तीब्रता दिइरहेको धरान–८ का सक्रिय सदस्य विनोद ढकालले बताएका छन् ।