धरानः धनकुटामा ब्रेक फेल भई लोबेट (ट्रक) मा आगलागी हुँदा एकजनाको मृत्यु भएको छ ।
हाइड्रोपावरको सामान बोकेर धरानबाट पाँचथरतर्फ जाँदै गरेको प्रदेश १–०२–००१ क ५३६३ नम्बरको ट्रक सोमबार राति ब्रेक फेल भई सडकमा पल्टिएपछि आगलागी भएको प्रहरीले जनाएको छ ।
तमोर करिडोरअन्तर्गत धनकुटाको चौबिसे गाउँपालिका–४ स्थित फलामेटारमा ट्रक दुर्घटना हुँदा आगलागी समेत भएको थियो । आगलागीमा जलेर चालकको मृत्यु भएको हो । ट्रकको अगाडीको भागमा आगो लागेकोमा चालक भोजपुर बस्ने अन्दाजी ३० वर्षीय बिशाल राई जलेर मृत्यु भएको प्रहरीले जनाएको छ ।
धनकुटाका प्रहरी प्रमुख एसपी नारायण रञ्जितकारका अनुसार घटनाको जानकारी प्राप्त हुनासाथ प्रहरी चौकी फलामेटारबाट खटिएको प्रहरी टोलीले आगो नियन्त्रणमा लिएको थियो ।
ब्रेकफेल भई सडकको भित्तामा ठोक्किँदा अचानक आगोलागी भएको उनले जानकारी दिए । तत्कालै अस्थायी प्रहरी पोष्ट फलामेटारबाट प्रहरी सहायक निरीक्षक खिलराज भट्टराईको कमाण्डमा प्रहरी टोली गएर आगलागी नियन्त्रणमा लिएको प्रहरीले जनाएको छ । सह–चालक तेह्रथुम म्याग्लुङ–९ बस्ने १८ वर्षीय सञ्जीव संगौला सकुशल रहेको प्रहरीले जनाएको छ ।