धरानः धरानस्थित बीपी कोइराला स्वास्थ्य विज्ञान प्रतिष्ठानका डाक्टर विश्वका उत्कृष्ट १० विज्ञमध्येमा परेका छन् ।
जनरल प्राक्टिस तथा इमर्जेन्सी मेडिसिन विभागका एडिसनल प्रोफेसर एवं डाइबिटोलोजिस्ट डा. अजय यादव अन्तर्राष्ट्रिय मधुमेह महासंघको प्रतिष्ठित शारीरिक गतिविधि कार्यान्वयन समितिमा चयन भएका छन् ।
प्रवक्ता प्रा.डा. शमशेर श्रेष्ठका अनुसार विश्वभरका सयौं विज्ञमध्येबाट छनोट गरिएका उत्कृष्ट १० विशेषज्ञमध्ये नेपालका तर्फबाट डा. यादव चयन भएका हुन् । यो नेपाल र बीपी प्रतिष्ठानका लागि महत्वपूर्ण अन्तर्राष्ट्रिय उपलब्धि मानिएको उनले बताए ।
अन्तर्राष्ट्रिय मधुमेह महासंघ विश्वका १६३ देशका २६४ राष्ट्रिय मधुमेह संघहरूको छाता संस्था हो । मधुमेह तथा यसका जटिलता रोकथामका लागि शारीरिक गतिविधिलाई विश्वव्यापी रूपमा प्रवद्र्धन गर्ने उद्देश्यले समिति गठन गरिएको हो ।
डा. यादव लामो समयदेखि मधुमेहको उपचार, परामर्श, रोकथाम तथा स्वस्थ जीवनशैली प्रवद्र्धनमा सक्रिय रहँदै आएका छन् । उनले रेडियो, टेलिभिजन, सामाजिक सञ्जाल तथा प्रत्यक्ष जनचेतनामूलक कार्यक्रममार्फत मधुमेह रोकथामबारे निरन्तर जनचेतना फैलाउँदै आएका छन् ।
प्रतिष्ठानले डा. यादवको यो उपलब्धिले अन्तर्राष्ट्रियस्तरमा नेपालको पहिचान अझ सुदृढ हुने र स्वास्थ्य प्रवद्र्धनमा सकारात्मक योगदान पुग्ने विश्वास व्यक्त गरेको छ ।