​धरानः चारकोसे जङ्गलको सेउती पुल नजिकै अब सांस्कृतिक तथा धार्मिक सुरक्षा कवच खडा गरिएको छ।
धरान–इटहरी सडक खण्डको यो अति जोखिमपूर्ण क्षेत्रमा यात्रा गर्ने चालक तथा यात्रीहरूको रक्षा, मङ्गल र सडक दुर्घटना न्यूनीकरणका लागि मङ्गलबार लिम्बू जातिको पवित्र विम्ब ‘सिलाम साक्मा’ स्थापना गरिएको छ।
​लिम्बू पत्रकार संघ, जिल्ला कार्यसमिति सुनसरीको आयोजना र विभिन्न दाताहरूको आर्थिक तथा भौतिक सहयोगमा उक्त धार्मिक तथा सांस्कृतिक धरोहरको निर्माण र स्थापना सम्पन्न भएको हो।
​मुन्धुमी विधिद्वारा ‘सोघा’ खेदियो
सिलामसाक्मा स्थापना गर्ने क्रममा लिम्बू समुदायको सांस्कृतिक दर्शन मुन्धुमअनुसार येवा (धामी/झाँक्री) हरूद्वारा विधिपूर्वक पूजाआजा गरिएको थियो। पूजाका क्रममा सडकमा अकाल मृत्यु गराउने र दुरात्मा मानिने ‘सोघा’ (नकारात्मक शक्ति) लाई विधिपूर्वक खेदिएको आयोजकले जनाएको छ।
​यसअघि गत असार ३२ गते बसेको लिम्बू पत्रकार संघ, सुनसरीको बैठकले संघका सङ्घीय तुम्याहाङ तथा किरात याक्थुङ चुम्लुङका केन्द्रीय सदस्य मोहनकुमार लिम्बूको संयोजकत्वमा ५ सदस्यीय निर्माण समिति गठन गरेको थियो। समितिमा वरिष्ठ पत्रकार हर्ष सुब्बा, प्रेम प्रकाश लिम्बू, प्रेम हुक्पा चोङ्बाङ र सङ्गीता सुब्बा सदस्य रहेका थिए।
​स्थानीय सामाजिक, सांस्कृतिक तथा बौद्धिक व्यक्तित्वहरूको बाक्लो उपस्थितिमाझ भव्य रूपमा सिलामसाक्माको अनावरण गरिएको थियो।
लिम्बू भाषामा ‘सिलाम’ को अर्थ मृत्युको बाटो वा कष्टको बाटो र ‘साक्मा’ को अर्थ रोक्नु वा छेक्नु भन्ने हुन्छ। अर्थात्, जीवनमा आइपर्ने अकाल मृत्यु, विपत्ति, रोगव्याधि र नकारात्मक शक्तिलाई छेक्ने बलियो बार (ढाल) नै सिलामसाक्मा हो।
​सुरक्षा र मङ्गलको प्रतीक: मुन्धुमअनुसार यात्रा वा दैनिक जीवनमा आइपर्ने बाधा-अड्चन र दुर्घटनाबाट बचाउने यो एक अचुक सुरक्षा कवच हो।
​सांस्कृतिक पहिचान: नौ वटा कुना र धागोको विशेष बुनाइबाट बन्ने यस विम्बले सम्पूर्ण सृष्टि र मानवतत्वको सन्तुलनलाई प्रतिनिधित्व गर्दछ।
​अशुभ शक्तिको नास: सोघा वा दुरात्मा खेदाएर मानिस र वातावरणलाई सुरक्षित राख्न यसको प्रयोग गरिन्छ।
चारकोसे जङ्गलको सडकमा स्थापना गरिएको यो सिलामसाक्माले धार्मिक आस्था जगाउनुका साथै चालकहरूलाई सडकमा सचेत गराउन मनोवैज्ञानिक भूमिका खेल्ने विश्वास लिइएको छ।
​लिम्बू पत्रकार संघ सुनसरीका अध्यक्ष स्वर्णिमहाङ फोम्बो लिम्बुका अनुसार, “यस धार्मिक विम्बले सडक प्रयोगकर्ताहरूमा उच्च सतर्कता र आध्यात्मिक विश्वास पैदा गरी दुर्घटना न्यूनीकरणमा ठूलो मद्दत पुर्‍याउनेछ ।