धरानः जेनजी आन्दोलनमा भागेका एकजना धरानबाट पक्राउ परेका छन् ।
जेनजी आन्दोलनको क्रममा झुम्का कारागारबाट फरार भएका एक व्यक्तिलाई प्रहरीले पक्राउ गरेको हो । वडा प्रहरी कार्यालय धरानबाट खटिएको प्रहरी टोलीले धरान उपमहानगरपालिका वडा नं. ७ स्थित डेरा गरी बस्ने वर्ष ३२ को मो. सहजादालाई पक्राउ गरेको इलाका प्रहरी कार्यालय धरानका डिएसपी भीषणबाबु राईले जानकारी दिए ।
खोजतलास गर्ने धरान–७ स्थित डेरा गरी बस्ने घर कोठाबाट पक्राउ गरी इलाका प्रहरी कार्यालय धरानमा ल्याइ झुम्का कारागार पठाउने कार्य भइरहेको प्रहरीले जनाएको छ ।
उनी मुद्दा नं. ०८१–सी१–०५१९ को लागूऔषध मुद्दामा सुनसरी जिल्ला अदालत इनरूवाबाट मिति २०८२।०१।०७ गतेको फैसलाले तीन वर्ष छ महिना कैद र १ लाख ४० हजार रुपैयाँ जरिवाना तोकी झुम्का कारागारमा भुक्तान गरिरहेका थिए । प्रतिवादी भारतको भागलपुर बिहान थाना हविपुर घर भई हाल धरानमै बसोबास गर्दै आएका थिए ।