धरानः श्रम संस्कृति पार्टीका अध्यक्ष तथा सांसद हर्कराज राई (साम्पाङ) ले प्रधानमन्त्री राहत कोषमा १५ लाख रुपैयाँ जम्मा गर्ने घोषणा गरेका छन् ।
धर्नाढुक लागेर पार्टीकै क्युआरमा पैसा हाल्नुहोला, सरकारको भर छैन भन्दै स्टाटस लेखिरहँदा चौतर्फी आलोचना भएपछि उनले ढिलोगरी आइतबार मात्रै सो घोषणा गरेका हुन् । उनले राज्यलाई नै च्यालेन्ज दिँदै यस्तो विपदको घडीमा पनि ‘नामको चर्चा पाउने भए’ श्रम संस्कृति पार्टीको खातामा पैसा पठाउन आग्रह गरिरहेका थिए । अधिकांश जनताले अहिलेसम्म आफूले एक रुपैयाँ पनि सहयोग नगरेको तर खाली मागेकै भरमा पार्टीलाई राम्रो देखाउन र घिनलाग्दो, नसुहाउँदो राजनीति गरिरहेको भन्दै चर्को आलोचना गरिरहेका थिए । उनले सरकारको भर नपर्नु, विश्वास नगर्नु भन्दै फेसबुकमा लेखिरहँदा अधिकांश जनताको आक्रोश पोखेका थिए । यसअघि अभियान चलाउँदाजस्तै उनले पार्टीका केही व्यक्तिको क्युआरमार्फत् राहत सहयोग मागिरहेका थिए । सरकारले नै क्युआरमार्फत् सहयोगको याचना गरिरहेको समयमा उनको यो हर्कत अधिकांशले मन पराएका थिएनन् । उनले विपदको घडीमा समेत घिनलाग्दो राजनीति गरिरहेको अधिकांशले बुझ्दै गएका थिए । उनी आफूचाहिँ फिल्डमा नजाने, सरकारको विरोध गरिरहने र पार्टी विस्तार गर्दै हिँड्ने भन्दै अहिले पनि खुब आलोचना भइरहेको छ ।
उनले पार्टीको तर्फबाट १५ लाख रुपैयाँ प्रधानमन्त्री कोषमा जम्मा गर्ने घोषणा गरेका हुन् ।
‘हाम्रो कलिलो तर मलिलो श्रम संस्कृति पार्टीले बाढीपीडितकोषमा १५ लाख रुपैयाँ जम्मा गर्ने घोषणा गर्दछौं, यो अहिलेलाई हाम्रो पार्टीको तर्फबाट हो र पछि राहत तथा साथ अभियानबाट अरु धेरै थप्नेछौं ।’ उनले फेसबुकमा लेखेका छन् ।