धरानः धरान आउँदै गरेको बसमा लागूऔषध भेटिएपछि पक्राउ परेका छन् ।
इटहरी उपमहानगरपालिका वडा नं. २० तरहरा पानीपिया जंगलस्थित कोशी लोकमार्गमा प्रहरी चौकी तरहरा, ट्राफिक प्रहरी पोष्ट तरहरा र कोशी प्रदेश प्रहरी कार्यालय धरान केनाइन शाखाबाट डग स्नाफिङसहित संयुक्तरुपमा खटिएको चेकिङ टोलीले इटहरीबाट धरानतर्फ आउँदै गरेको यात्रुबाहक बसमा सवार यात्रुबाट लागूऔषध भेटिएको हो ।
सुनसरीको हरिनगरा गाउँपालिका वडा नं. २ बस्ने वर्ष १८ को एइसन मन्सुरी र दुहवी नगरपालिका वडा नं. २ बस्ने वर्ष २० को मोहमद दिलकशलाई खानतलासी तथा चेकजाँच गर्दा उनीहरू साथबाट लागूऔषध भेटिएको हो । नाइट्राजेपाम ट्याब्लेट १९० पिस फेला परेको प्रहरीले जनाएको छ ।
यस्तै, सुनसरी देवानगंज गाउँपालिका वडा नं. ३ पाँचौ सिमरमा प्रहरी चौकी कप्तानगञ्जबाट खटिएको प्रहरी टोलीले भारतबाट नेपालतर्फ आउँदै गरेको को. २५ प. ७८९७ नम्बरको मोटरसाइकलमा सवार व्यक्तिको साथबाट ब्राउन सुगर भेटिएको छ ।
सन्दीप कुमार मेहतालाई खानतलासी तथा चेकजाँच गर्दा निजको साथबाट लागू औषध ब्राउन सुगर ०.२१ ग्राम फेला परेको प्रहरीले जनाएको छ ।