धरानः भदौ १० गते भोटेकोशीमा आएको महाप्रलयकारी बाढीले नुवाकोटस्थित त्रिशुली–३ बी क्षेत्रमा काम गर्दै आएका धरानका भूगर्भविद् मुकेश नेपाल हालसम्म पनि सम्पर्कविहीन छन् । धरान वडा ६ पानबारीका नेपाल त्रिशुली ३ आयोजना अन्तर्गत हेवा जलविद्युत परियोजनामा भूगर्भविद्का रूपमा कार्यरत थिए । उनका बुबा रमेश नेपालका अनुसार मुकेशले बाढी आउनुअघि परिवारसँग फोनमा कुराकानी गरेका थिए । त्यसपछि भने उनको मोबाइलमा सम्पर्क हुन सकेको छैन ।
उनीलगायत त्रिशुली ३ बी आयोजनाबाट बेपत्ता परिवारले प्रदर्शन गर्दै उद्धार तीब्र बनाउन माग गर्दै प्रदर्शन गरेका छन् । १३ दिन बितिसक्दा पनि उनीहरूबारे कुनै ठोस जानकारी प्राप्त नभएको भन्दै हाइड्रोपावरको क्याम्पमा बेपत्ता भएका व्यक्तिका परिवार तथा आफन्तले उद्धार कार्य तीव्र बनाउन माग गर्दै काठमाडौंमा प्रदर्शन गरेका छन् ।
सोमबार काठमाडौंको माइतीघरमा प्रदर्शन गर्दै उनीहरूले बाढी आएको लामो समय बितिसक्दा पनि त्रिशूली–३ ‘बी’मा उद्धार तथा खोजी कार्य प्रभावकारी रूपमा अघि बढ्न नसकेको भन्दै सरकारको ध्यानाकर्षण गराएका हुन् । प्रदर्शनमा सहभागीले उद्धार कार्यलाई अझै सशक्त र तीव्र बनाउन माग गरे ।
रेस्क्युलाई अझै सशक्त र फास्ट गर्नुपर्छ भन्दै उनीहरूले बाढीले धेरै ठाउँमा असर पारेको र भौगोलिक अवस्थाका कारण पनि उद्धारमा कठिनाइ भएको हुन सक्ने भएपनि स्रोत र साधन भए तत्काल सञ्चालन गर्ने र नभएको अवस्थामा पनि कहाँबाट उपलब्ध गराउन सकिन्छ भन्नेतर्फ सरकारले पहल गर्नुपर्ने बताएका छन् । उनीहरूले सुरुदेखि नै उद्धारका लागि उपलब्ध स्रोत–साधन परिचालन गर्नुपर्नेमा ढिलाइ भएको गुनासो गरे ।
त्रिशूली–३ ‘बी’ पूरै बिल्डिङ, हाउसहरू र अफिसहरू सबै पुरिएका छन् । आइतबार हराइरहेकाहरूको खोजीका लागि अडिट सुरुङ सफा गर्ने र ठूला मेसिनरी उपकरण लैजाने काम साँझसम्म सकिएको थियो । त्यसपछि सोमबारदेखि खोजी कार्यलाई थप तीब्रता दिइएको बताइएको छ ।
बाढी र पहिरोपछि आयोजनामा कार्यरत १९१ जना सम्पर्कविहीन भए । तीमध्ये १३ जना सम्पर्कमा आए पनि अझै १७८ जना सम्पर्कविहीन रहेको कम्पनीले जनाएको छ ।