धरानः धरानको बगरकोटबाट भानुचोकतर्फ आउँदै गरेको मोटरसाइकलको ठक्करले महिलाको मृत्यु भएको छ ।
धरान-१५ एभरेष्ट लाइनस्थित घरमा आउने क्रममा पैदलयात्रामा रहेकी ६७ वर्षीय चन्द्रकला गुरुङलाई बा५१प ९१२२ नम्बरको मोटरसाइकलले ठक्कर दिएको थियो । तत्कालै उनको उपचारका लागि धरानस्थित बीपी कोइराला स्वास्थ्य विज्ञान प्रतिष्ठान ल्याइएको थियो । उपचारका क्रममा उनको आज भर्खरै निधन भएको इलाका प्रहरी कार्यालय धरानका डिएसपी भीषणबाबु राईले जानकारी दिए ।
गुरुङलाई पछाडि सोबाट ठक्कर दिँदा उनी गम्भीर घाइते बनेकी थिइन् । उनको टाउको दुवैखुट्टा र अनुहारमा चोट लागेको र तत्काल बोल्न नसक्ने गम्भीर अवस्थामा उपचारका लागि ल्याइएको थियो ।
प्रहरी सहायक निरीक्षक डम्बर लिम्बूको कमान्डमा प्रहरी पुगेर मोटरसाइकल चालकलाई नियन्त्रणमा लिन खोज्दाखोज्दै ‘स्पीड’ गतिमा भागेका थिए तर प्रहरीले खोजी तीब्र बनाउँदै समातेको छ । मोटरसाइकल चालक दीपक तामाङलाई हाल नियन्त्रणमा पक्राउ गरिसकिएको प्रहरीले जनाएको छ ।
तीब्र गतिमा मोटरसाइकल चलाएको कारण दुर्घटना भएको पाइएको प्रहरीले जनाएको छ ।
उनको घर धरान–१५ एभरेष्ट लाइनमै छ । उनी सामाजिक कार्यमा सक्रिय व्यक्तित्व हुन् । धरान-१५ स्थित एभरेष्ट वातावरण समूहमा लामो समय काम गर्दै सामाजिक कार्यमा होमिएकी गुरुङ विभिन्न सामाजिक संघसंस्थामा आवद्ध थिइन् । त्यस्तै, चन्द्रकला तमु हयुल छोज धीं गुरुङ राष्ट्रिय परिषद्का सल्लाहकार तथा पूर्व केन्द्रीय सदस्य थिइन् ।
गएको २३ गते मंगलबार उनलाई सो मोटरसाइकलले ठक्कर दिएको र उपचारका क्रममा बिहीबार उनको निधन भएको हो ।