धरानः धरानमा बेवारिसे गाँजा फेला परेको छ ।
धरान-४ मा २५ केजी बेवारिसे गाँजा फेला पारेको हो । धरान-भेडेटार सडक खण्डअन्तर्गत निशाने केहीमाथि सो गाँजा भेटिएको प्रहरीले जनाएको छ ।
प्रादेशिक अनुसन्धान समूह र इलाका प्रहरी कार्यालय धरानको प्रहरी टोलीले धरान उपमहानगरपालिका–४ स्थित कोशी लोकमार्गमा बेवारिसे अवस्थामा २५ किलोग्राम गाँजा फेला पारेको इलाका प्रहरी कार्यालय धरानका डिएसपी भीषणबाबु राईले जानकारी दिए ।
गाँजा बरामद भएपनि गाँजा कसले राखेको हो भन्नेबारेमा केही खुलिनसकेको उनले जानकारी दिए । यस विषयमा हामीले थप अनुसन्धान भइरहेको समेत उनले बताए । प्रहरीले चाल पाएको सुइँको पाएपछि गाँजा राख्नेहरू सुइँकुच्चा (अरू कसैले चाल नपाउने गरी भागे) ठोकेका छन् । ‘प्रहरी आउँदैछन् भन्ने चाल पाएपछि उनीहरू पहिल्यै भागिसकेका रहेछन्, हामीले गाँजा मात्रै बरामद गरयौं, गाँजा राख्नेहरूको खोजी तीब्र बनाउँदै अनुसन्धानलाई पनि फराकिलो पारेका छौं ।’ उनले भने ।
यस्तै, मोरङको प्रहरी चौकी मझारेले जहदा गाउँपालिका-२ मा पनि बोरामा ३२ किलोग्राम ७६० ग्राम गाँजा बरामद भएको प्रहरीले जनाएको छ ।
प्रहरीले भत्कायो लागूऔषध बिक्री केन्द्र
प्रहरीले लागूऔषध खैरो हिरोइन (ब्राउन सुगर) सहित दुईजना भारतीय नागरिकलाई पक्राउ गरेको छ ।
प्रहरी उपरीक्षक दुर्गाराज रेग्मीका अनुसार उनीहरूले बिक्री केन्द्र बनाइ लागूऔषध नै बिक्री गर्ने गरेका थिए । सुनसरी र मोरङका दुव्र्यसनीहरूलाई केन्द्रित बनाई लागूऔषध बिक्री गर्ने गरेका उनीहरूलाई ४५ ग्राम ९५० मिलिग्राम खैरोहिरोइनसहित पक्राउ गरिएको उनले जानकारी दिए ।
पक्राउ पर्नेमा भारतको अररिया घर भएका २२ वर्षीय विक्कीकुमार मण्डल, १८ वर्षीय अमजद अन्सारी रहेको प्रहरीले जनाएको छ । उनीहरूको भारतीय नम्बर प्लेटको मोटरसाइकल पनि बरामद भएको प्रहरीले जनाएको छ ।