धरानः धरान–१६ स्थित प्रदेश नं.१ को एक मात्र छात्राहरू पढ्ने शारदा बालिका नमूना माविबाट एसइई परीक्षा दिने तयारी गरिरहेका छात्राहरूलाई मंगलबार शुभकामना प्रदान र पुरस्कार वितरण कार्यक्रम सम्पन्न भएको छ ।
कार्यक्रममा हाजिरीजवाफ, वक्तृत्वकला प्रतियोगिता, कविता वाचन, खेलकुदलगायत विभिन्न विधामा उत्कृष्ट भएका छात्राहरूलाई पुरस्कार प्रदान गरिएको थियो ।
वर्षको उत्कृष्ट विद्यार्थीको अवार्ड समिक्षा राई, उत्कृष्ट साहित्यिक अवार्ड तुलसा राई, उत्कृष्ट कलाको अवार्ड रीया राई, उत्कृष्ट खेलकुदको अवार्ड मनिषा दाहाल, उत्कृष्ट इमान्दार विद्यार्थीको अवार्ड पवित्रा राई र उत्कृष्ट प्रगतिशील विद्यार्थीको अवार्ड अनुष्का राईले प्राप्त गरेकी छिन् ।
पुरस्कृत छात्राहरूलाई विद्यालय ब्यवस्थापन समितिका अध्यक्ष केशव श्रेष्ठ, विद्यालय ब्यवस्थापन समितिका सदस्य दिभा श्रेष्ठ, विद्यालयका प्रअ इन्द्रबहादुर राई, शिक्षिका अर्चना ढकाल, शिक्षकद्वय राजन कार्की र लाल बिहारी यादवलगायतले पुरस्कार वितरण गरे ।
एसइई दिने छात्राहरुलाई प्रअ राई, सहायक प्रअ धर्मनारायण सिंह, शिक्षक पदम लुइँटेल, गुरुप्रसाद दाहाल, निर्मल जोशी, सञ्चारकर्मी तिर्थ कार्की लगायतले उत्कृष्ट नतिजा ल्याएर उत्तीर्ण गर्न शुभकामना दिए ।
कार्यक्रममा विद्यार्थीहरुले नृत्य, गीत, कविता तथा क्यारिकेचर प्रस्तुत गरे । कार्यक्रमको सञ्चालन छात्राद्वय रिया राई र रेजिना विकले गरे । आगामी चैत ६ गतेबाट शुरु हुने यसपालिको एसइईमा स्कुलबाट ७४ जना छात्राहरूले परीक्षा दिँदैछन् ।