धरानः धरानमा होली पर्वमा साथीबीचको विवादले छुरा हानाहान भएको छ ।
छुरा प्रहारबाट दुई घाइते भएका छन् । होली खेल्ने क्रममा साथीबीच विवाद बढेको थियो । धरान–१२ को पब्लिक हाइस्कुलको मैदानमा साथीसाथीबीच विवाद बढ्दै जाँदा धरान–१ का प्रकाश तामाङले धरान–४ का अनन्त राई र धरान–१५ बस्ने पेम्बा लामामाथि छुरा प्रहार गरेका थिए । पेम्बालाई छुरा हानेपछि अनन्त छुट्याउन पुगेका थिए । छुट्याउन जाँदा उनीमाथि पनि छुरा प्रहार भएको पेम्बाले बताए । छुरा प्रहारबाट उनीहरू घाइते बनेका छन् । घाइतेहरूको बीपी प्रतिष्ठानमा उपचार भइरहेको छ । पुरानो रिसइवीका कारण छुरा प्रहार भएको हुनसक्ने प्रहरीको भनाइ छ ।
इलाका प्रहरी कार्यालय धरानका प्रमुख डिएसपी ढुण्डीराज न्यौपाने सामान्य विवादमै छुरा प्रहार भएको र छुरा प्रहार गर्ने एक युवालाई समातेको बताए । प्रकाशलाई प्रहरीले विजयपुर हस्पिटल नजिकै लुकेको अवस्थामा पक्राउ गरेको जानकारी दिए ।
घाइतेमध्ये अनन्तको बायाँ कोखामा छुराको चोट छ भने पेम्बाको हातमा छुरा लागेको छ । ‘घटनापछि फरार भएका प्रकाशलाई खोजी गर्दा लुकेर बसेको अवस्थामा फेला पारेर ल्याइसकेका छौ’, डिएसपी न्यौपानेले भने, ‘के भएर घटना भएको हो भन्नेबारे थप अनुसन्धान भइरहेको छ ।’ अघिल्लो वर्षको होलीमा धरान–८ का निमा तामाङको छुरा प्रहारबाटै मृत्यु भएको थियो ।