धरानः धरानको पुरानो बजार (माछा बिक्री हुने ठाउँ छेऊ) को न्यू जयन्ती स्टोरका सञ्चालक यौवन खड्गी सम्पर्कमा नआएपछि ग्राहकले घर घेरेका छन् ।
१८ प्रतिशतसम्म ब्याज पाउने लोभमा सुनचाँदीलगायतका सरसामान, रकम समेत राखेका उनीहरूले केही महिनादेखि सञ्चालक खड्गी सम्पर्कमा नआइ पसलमा तालाचाबी लगाएर बेपत्ता बनेपछि घर घेराउ गरेको बताएका छन् ।
३१ लाख रूपैयाँमा फँसेकी पीडित ललिता श्रेष्ठले अहिलेसम्म सम्पर्कमा नआएपछि घर घेराउ गर्न आएको बताइन् । खाइनखाइ भाडा मलेर कमाएको बताउने विमला परियारले आफ्नो ४ लाख ४० हजार डुबेको बताइन् । उनीजस्तै सञ्चालक बेपत्ता भएर थाहा पाउने पाउने र घर घेराउ गर्न आइपुगेका ८५ जना नाघिसकेको छ । पीडित सोम खड्गीले हालसम्म ८५ जना पीडितको नाम खातामा टिपिइसकेको बताइन् । पीडितले वडा कार्यालयमा पनि निवेदन हालिसकेको उनले बताइन् । कसैको लाखौं, कसैको हजारौं रकम डुबेको उनले बताइन् । हालसम्मको नामलिष्ट हेर्दा ६ करोड बढी डुबेको आशङ्का गरिएको उनले बताइन् । उनले पीडित अझै आउने क्रम जारी रहेको बताइन् । ‘कसैको हजारौं त कसैको लाखौं, एकजनाको एक करोड डुबेको पाइयो’, उनले भनिन् ।
धरान–१४ का झलकमान श्रेष्ठका अनुसार पीडितलाई सञ्चालक खड्गीकी श्रीमतीले तमसुक गराउने बचन मात्रै दिएकी छिन् । ‘बेपत्ता हो वा होइन पहिला पत्ता लगाउँछौं, अहिले तमसुक गराउँछु भनेर सञ्चालककी श्रीमतीले भनेकी छिन् ।’ पीडितका अनुसार सञ्चालक खड्गी अष्ट्रेलिया पुगिसकेका छन् ।