धरानः विश्वभर महामारीकोरुपमा फैलिएको कोभिड–१९ को सचेतनास्वरुप धरान–१६ ले अभियान चलाएको छ ।
धरान–१६ का वडाध्यक्ष, वडा सदस्य घरघरै पुगेर सचेतना अभियान सञ्चालन गरेको हो । विदेशबाट फर्किएकालाई घरमै पुगेर सम्झाउने कोसिस गरिएको वडाध्यक्ष दिलकुमार गिरीले जानकारी दिए । ‘यदि कोही विदेशबाट फर्किएका हुनुहुन्छ भने उनीहरूलाई घरमै पुगेर एकपटक चेकजाँच गर्ने अथवा होम क्वारेन्टाइनमा बस्ने सल्लाह दिँदै आएका छौं ।’ उनले भने । सबैलाई रोगले समातेको भन्ने हुँदैन तर पनि सचेतना त अपनाउनुपर्छ भन्ने सन्देश दिन खोजिएको उनले बताए ।
वडाका घररघरमा पुगेर विदेशबाट आएकालाई होम क्वारेन्टाइनमा बस्न दिएको सुझाव अनुसार उनीहरू होम क्वारेन्टाइनमा बसेको उनले जानकारी दिए । उनले मंगलबार र बुधबारसम्ममा धरान–१६ मा १२ जना विदेशबाट फर्किएको जानकारी आएको र उनीहरूमध्ये केहीलाई बीपी प्रतिष्ठानको एम्बुलेन्स आएर लिएर गइसकेको पनि उनले बताए । ‘केहीलाई होम क्वारेन्टाइनमै बस्न भनेका छौं, केहीलाई बीपी प्रतिष्ठानमा चेकजाँचका लागि पठाइसकेका छौं ।’ उनले भने । १२ जनाकै स्वास्थ्य अवस्था अहिलेसम्म ठीक रहेको उनले जानकारी दिए ।
उनले विदेशबाट फर्किएका अन्य कोही भए जानकारी दिन वडाबासीलाई आग्रह समेत गरेका छन् । ‘यदि कोही विदेशबाट फर्केर आउनुभएको छ भने नलुकाउनुहोस्, होम क्वारेन्टाइनमै बसौं, अप्ठयारो परे हामीलाई सम्पर्क गरौं ।’ उनले भने ।
अहिले धरान उपमहानगरपालिकाले पनि सबै वडामा विदेशबाट फर्किएका व्यक्तिहरुको तथ्याङ्क संकलनमा जुटेको उनको भनाइ छ । ‘विदेशबाट फर्किनुभएकालाई १४ दिनसम्म घरमा छुट्टै बस्न लगाएका छौं’, उनले भने, ‘उहाँहरुको इच्छा अनुसार होम क्वारेन्टाइनमा बस्न छाडेका छौं । बसे नबसेको नियमित अनुगमन गरिराखेका छौं ।’ भाइरस रोकथामका लागि सरकारले गरेको लकडाउनको निर्णय पालना गरी सहयोग गर्न धरान उपमहानगरपालिकाले आग्रह गरेको छ । यसअघि फ्रान्सबाट आएकी कोरोना संक्रमितसँगै आएकामध्ये धरान–१६ का एकजना रहेको अफवाह फैलिएको थियो ।