धरानः बन्दाबन्दीको मौका छोपी औषधिजन्य सामग्री ओसारपसार हुने गरेको खुलेको छ ।
धरान प्रहरीले बन्दाबन्दीकै समयमा पनि लागूऔषधसहित समात्ने क्रम जारी छ । लागूऔषध कारोबार तथा ओसारपसारमा संलग्न रहेको पाइएपछि उनीहरूलाई लागूऔषधसहित नै समात्ने गरेको प्रहरीले जनाएको छ ।
यसैबीच मंगलबार प्रहरीले ठूलो परिमाणमा लागूऔषधसहित एक व्यक्तिलाई धरानबाटै पक्राउ गरेको छ । धरान–९ बगैंचा लाइनबाट ठूलो परीणामको लागूऔषध र नगदसहित एकजनालाई पक्राउ गरिएको इलाका प्रहरी कार्यालय धरानका डिएसपी ढुण्डीराज न्यौपानेले जानकारी दिए ।
मंगलबार दिउँसो साँढे २ बजे इलाका प्रहरी कार्यालय धरानबाट खटिएको प्रहरी टोलीले ४१ वर्षीय शुभचन्द्र राईलाई पक्राउ गरेको हो । राईको कोठा खानतलासी गर्दा सो घरको पूर्वतर्फ फर्किएको ढोकाको कुनामा लुकाइछिपाई राखेको प्लाष्टिकको बोराभित्र लागूऔषधसहित फेला पारेको प्रहरीले जनाएको छ । उनको डेरा कोठाबाट स्पास्मोप्रोक्सिवन प्लस १२८० क्याप्सुल, नाइट्रोजन ३०० ट्याबलेट , डिलक्स डिसी १०० एमएल लेखिएको ८० बोतल र नगद २ लाख ३७ हजार रूपैयाँ बरामद गरेको प्रहरीले जनाएको छ ।
लागूऔषध र नगद सहित पक्राउ परेका राईको सम्बन्धमा थप अनुसन्धान भइरहेको इलाका प्रहरी कार्यालय धरानले जनाएको छ ।
यसअघि केहीदिनअघि प्रहरीले धरान–१३ बाट लागुऔषध ब्राउनसुगर र लागुऔषध ट्याब्लेटसहित तीनजना पक्राउ गरिसकेको छ । धरान १३ की २६ वर्षीया समिया लिम्बु, धरान–१३ कै २९ वर्षीय मन्दिप मगर र धरान १५ का ४३ वर्षीय घनश्याम राईलाई पक्राउ गरेको हो ।
यस्तै, लकडाउनकै समयमा लागुऔषध खरीद गर्न धरानबाट गएका दुई युवासहित तीन जनालाई प्रहरीले ठुलो परिमाणको लागुऔषधसहित पक्राउ गरेको छ । सुनसरीको भोक्राहा नरसिंह गाउँपालिका ६ नहरचोकबाट जिल्ला प्रहरी कार्यालय सुनसरीको टोलीले उनीहरुलाई पक्राउ गरेको हो । पक्राउ पर्नेमा भोक्राहा नरसिंह गाउँपलिका ३ का राजकुमार मण्डल रहेका छन् भने उनीसँग लागुऔषध खरीद गर्न पुगेका धरानका ८ का २७ वर्षीय अजय श्रेष्ठ र अर्जुन कार्की रहेका छन् ।