धरानः धरानमा युवामाथि सांघातिक आक्रमण गरेको आरोपमा दुई युवा पक्राउ परेका छन् ।
पक्राउ पर्नेमा धरान–५ का वडाअध्यक्ष सन्तोष लिम्बूका कान्छा भाइ दीपेश लिम्बूु र अनित लिम्बू रहेका छन् । बिहीबार राष्ट्रिय युवा संघ नेपालले विज्ञप्ति जारी गर्दै कानुनी कारवाहीको माग गरेको थियो । इलाका प्रहरी कार्यालय धरानका डिएसपी ढुण्डीराज न्यौपानेले सो घटनामा दुईजना पक्राउ परेको र घटनाबारे अनुसन्धान भइरहेको बताए ।
राष्ट्रिय युवा संघ नेपालका राजेन्द्र राई र विजय तामाङले विज्ञप्ति जारी गर्दै वडाध्यक्षकै निर्देशनमा आक्रमण भएको भन्दै उजुरी दिएका थिए । धरान–१५ बगरकोट पुलपारी भिन्टेज रिसोर्ट अगाडि धरान उपमहानगरपालिकाको गिटी, बालुवा निकासीको कर काट्ने क्रममा सुमन धामी र मन्दिप राईमाथि १२–१५ जनाको समूहले सांघातिक आक्रमण गरेको विज्ञप्तिमा जनाइएको छ । मन्दिपलाई सामान्य चोट लागेको छ भने धामी टाउकोमा खुकुरीको दापले हिर्काएर चोट लागेको छ । यस्तै, ओठ फुटेको र एउटा दाँत पनि भाँचिएको छ ।
वडाध्यक्ष लिम्बूको सवारी साधनलाई पनि पैसा लिएको भन्दै आक्रमणपछि कुटपिट गरेको ती युवाले बताए । उनले वडाध्यक्षकै समूहले ५२ हजार तीन सय २० रूपैयाँ र पुर्जी पनि लिएर गएको उनीहरूले बताए । उता वडाध्यक्ष लिम्बूले भने आफूलाई केही थाहा नभएको र गल्ती पनि नभएकोले आफूले पनि प्रहरीमा उजुरी दिएको बताएका छन् ।