धरानः अन्ततः इलाका प्रहरी कार्यालय धरानका प्रहरी नायव उपरीक्षक (डिएसपी) ढुण्डीराज न्यौपानेको विदाइ गरिएको छ ।
उनी सरुवा भएर प्रहरी प्रधान कार्यालय मानव बेचबिखन ब्युरो नक्सालमा पुग्नेछन् । धरानमा नयाँ डिएसपी डिएसपी ज्ञानेन्द्रबहादुर बस्नेत आउने भएका छन् । सुनसरी उद्योग वाणिज्य संघको आयोजनामा सोमबार धरान उपमहानगरपालिकाका मेयर तिलक राई, उपमेयर मञ्जु भण्डारी तथा सुनसरी उद्योग वाणिज्य संघका वस्तुगत संस्थाका प्रतिनिधिहरुबीच उनको विदाइ भएको हो ।
संघले डिएसपी न्यौपानेलाई विदाई कार्यक्रम आयोजना गरेको हो । न्यौपानेले १३ महिना धरान बसाइको क्रममा धरानवासीहरुलाई पुरयाएको सेवाका लागि सुनसरी उद्योग वाणिज्य संघका अध्यक्ष गिरिधारी सापकोटाले संघ र धरानका व्यवसायीहरुका तर्फबाट आभार व्यक्त गरेका थिए ।
कार्यक्रममा डिएसपी ढुण्डीराज न्यौपानेले १३ महिना अत्यन्तै छोटो रुपमा व्यतित भएको बताएका छन् । डिएसपी न्यौपानेले धरानमा काम गर्नु अत्यन्तै गाह्रो हुने यदाकदा चर्चा हुने गरेको पाइएपनि त्यो भन्दा फरक धरानवासीकोे साथ र सद्भावले अत्यन्तै सहज महसुस गरेको बताए ।
डिएपी न्यौपानेले शुरुमा धरान आउँदा सबैलाई चिन्न गाह्रो भएपनि विदाइ कार्यक्रममा सबैको माया पाउँदा आफूलाई गौरन्वान्वित महसुस गरेको र जिम्मेवारी बढेको महसुस गरेको बताए । संघका महासचिव राजेश अग्रवालले सञ्चालन गरेको सो कार्यक्रममा सुनसरी उद्योग वाणिज्य संघका अध्यक्ष लगायत वस्तुगत संस्थाका अध्यक्षहरुले डिएसपी न्यौपानेलाई मायाको चिनो समेत प्रदान गरेका थिए ।
१३ महिनाअघि धरान आएका उनले आपराधिक गतिविधि एवं गुण्डागर्दीविरुद्ध प्रहरी कठोर बनेको ठम्याइ स्थानीयको छ । कार्यकालभरमा उनी सुनसरी जिल्लाको पुलिस अफ दि मन्थ (महिनाको उत्कृष्ट प्रहरी) घोषित भएका थिए । उनलाई जिल्ला प्रहरी कार्यालय सुनसरीले असार महिनाको उत्कृष्ट प्रहरी घोषणा गरेको हो । डिएसपी न्यौपानेले धरान र मातहतमा समेत एरिया इलाकाहरुमा घटेका संगठित अपराधहरू, अवैध हातहातियार खरखजना, चोरी, डाँका, लागुऔषधजस्ता जघन्य अपराधहरुको गहन विश्लेषण गरी सफल अनुसन्धान गरेकोले उत्कृष्ट प्रहरी घोषित गरिएको थियो ।