धरानः धरानस्थित बीपी कोइराला स्वास्थ्य विज्ञान प्रतिष्ठानमा उपचारका लागि ल्याइएको बालकमा कोरोना पोजेटिभ देखिएको छ ।
प्रतिष्ठानको अर्थो अब्जरभेसन वार्डमा भर्ना भएका बालकमा रिपोर्ट पोजेटिभ आएको हो । सो वार्ड बिहीबार रातिबाट सिल गरिएको छ । वार्डमा १० दिनअघि जँचाउन आइपुगेका एक बालकमा पिसिआर परीक्षण नै पोजेटिभ देखिएपछि वार्ड सिल गरिएको हो ।
घुँडामाथि फ्याक्चर भएका ती बालकको अप्रेसन गर्नुपर्ने भएपछि पिसिआर जाँच गरिएको चिकित्सकले बताएका छन् । ‘अहिले ट्रेसिङको काम भइररहेको छ भने उनलाई भेट्न आउने आफन्त, कुरुवाहरुको पनि ट्रेसिङ भइरहेको छ’, विभागीय प्रमुख प्रा.डा. पशुपति चौधरीले भने ।
प्रतिष्ठानका प्रवक्ता डा. निदेश सापकोटाले बिहीबार बेलुकी बच्चाको रिपोर्ट कोरोना पोजेटिभ आएको बताए । बच्चामा कोरोना पोजेटिभ देखिएपछि उनलाई आइसोलेसन वार्डमा सारिएको उनले जानकारी दिए । ‘उनको अप्रेसन गर्नुअघि जाँच्ने क्रममा रिपोर्ट पोजेटिभ देखिएपछि उनलाई बिहीबार नै आइसोलेसन वार्डमा सिफ्ट गरिसकेका छौं’, हाम्रो कोशी आवाज डटकमसँग कुरा गर्दै प्रवक्ता डा. निदेशले भने ।  संक्रमित बालक धरान बाहिरको रहेको उनले जानकारी दिए ।