धरानः लकडाउनकै बेला पनि धरानमा फाट्टफुट्ट पसल स्वतःस्फुर्तरूपमा खुल्न थालेका छन् ।
धरानमा केही पसलहरू खुलेका हुन् । विशेषतः कपडा पसल, पुस्तक, तरकारी, खाद्यान्नलगायतका पसल खुल्ला छन् । सामाजिक दूरी कायम गर्दै बिहान ८ बजे देखि १२ बजेसम्म पसल सञ्चालन गरिएको व्यवसायीले बताएका छन् । मुख्य बजार, सहायक बजार आदिमा पसल खुल्ला छन् । दुईदिनअघिदेखि खोलिएको पसलमा खरिदकर्ता भने खासै आएका छैनन् । ‘पसल खुला भए पनि खरिदकर्ता अर्थात् ग्राहक भने एकजना पनि आएका छैनन् ।’, धरान–९ पुतलीलाइनका व्यवसायी जीवन श्रेष्ठले बताए ।
त्यसमाथि कारोनाको डर एकातिर आवश्यकबाहेक अन्य कामकाजका लगि मानिस बाहिर निस्केका छैनन् । ‘मानिसको आवतजावत नै कम भएपछि सामग्री खरिद गर्नका लागि मानिस आउने त कुरै भएन तर पनि फाट्टफुट्ट आइरहेका छन्’, धरान–९ स्थित हिमाल कलेक्सनकी टंककुमारी गुरुङले भनिन् ।
‘मेरोमा अहिलेसम्म कोही किन्न नै आएको छैन, पसल सफा गरयो बस्यो’, धरानस्थित भानुचोकमा रहेको पसलका बिक्रेता विक्रम श्रेष्ठले भने । धरानस्थित छाताचोकमा केरा बेच्दै आएकी सुशिला खनालले बिहानदेखि ११ बजेसम्म दुई जना उपभोक्ता आएको बताइन् । ‘सबैले कोरोना कोरोना भन्छन्, त्यही भएर पनि कोही बाहिर निस्कन सकेकै छैनन् नि ।’
विश्वभरि फैलिएको कोरोना भाइरसका कारण सरकारले अहिले देश पूरै लकडाउन गरेको छ । दैनिकीलाई सहज बनाउँदै विस्तारै लकडाउन खोल्ने विषयमा सरकारका पदाधिकारीबीच छलफल भइरहेकै समयमा व्यापारीले भने दैनिकी चलाउन समस्या भएको भन्दै केही व्यवसाय सञ्चालन गरेका हुन् । लकडाउनको मोडालिटी परिवर्तन गरी नागरिकको दैनिकी सहज बनाउने विषयमा सरकार सकारात्मक रहेको भए पनि के कसरी व्यापार व्यवसाय सञ्चालन गर्ने भन्नेबारे यकिन निर्णय आउन बाँकी नै छ ।
व्यवसायीले सरकारले तोकेको मापदण्डअनुसार सुरक्षा सतर्कता अपनाइएको बताएका छन् । सुनसरीका ४ वटा उद्योग वाणिज्य संघहरुले पनि संयुक्त विज्ञप्ती जारी गर्दै लकडाउनलाई खुकुलो बनाउदै जोन छुट्याएर व्यापार, व्यवसाय सुचारु गर्न समय तोक्नुपर्ने पनि माग गरेको छ । सुरक्षाको उपायहरु अवलम्बन गरेर सामाजिक दुरी कायम गर्दै व्यवसायीहरुलाई दैनिक बिहान १० बजेदेखि बेलुकी ५ बजेसम्म व्यवसायिक गतिविधिहरु सञ्चालन गर्न दिइनुपर्ने माग संघहरुको छ ।
यसअघि धरान उपमेयरपालिकाका नगरप्रमुख तिलक राईले आवश्यकताअनुसार पसल खोल्नुपर्ने बताएका छन् । यसअघि मेयर राईले कोरोनासँग सतर्क रही सुरक्षाका मापदण्ड अपनाएर आवश्यकताअनुसार व्यवसाय सञ्चालन गर्नुपर्ने र त्यसका लागि वाणिज्य संघको सहभागितामा एउटा टिम तयार गरी मोडालिटी तयारी हुनुपर्ने बताएका थिए । तर संघले अहिलेसम्म केही मोडालिटी तयार गरेका छैनन् ।
तर पनि पसलमा केही भीड, सडकमा सवारी साधन चल्न थालेपछि थालेपछि सजग हुनुपर्ने जनस्वास्थ्यविद्हरुको भनाइ छ । लामो समयको लकडाउनले कष्टकर रुपमा जनजीवन बिताएको कारण मानिसहरु बाहिर निस्केपनि कोरोना भाइरस संक्रमणको सन्त्रास अझैं नसकिएको उनीहरु बताउँछन् ।
फोटोः हाम्रो कोशी आवाज डटकम