धरानः धरानमा एक युवामा डेंगुको संक्रमण देखिएको चिकित्सकले पुष्टि गरेका छन् ।
धरान–२० का १९ वर्षीय युवा भुपाल तामाङलाई डेंगु रोग देखा परेको चिकित्सकले बताएका छन् ।
धरानस्थित विजयपुर अस्पतालका मेडिसिन विभागका वरिष्ठ फिजिसियन डा. विवेकप्रभात शाहले युवामा डेंगु देखिएको पुष्टि गरे । डेंगु रोगले थला परेका उनी सो अस्पतालमा भर्ना भएपछि उनमा रगत परीक्षण गर्दा डेंगु देखा परेको उनी बताउँछन३ । ‘ज्वरो आएर भर्ना भएका उनको रगत परीक्षण गर्दा डेंगु रोग देखा परेको छ’, उनले भने, ‘तामाङको अवस्था सामान्य रहेको छ ।’
उनी सोमबार अस्पताल भर्ना भएको अस्पतालका प्रमुख प्रशासक इन्दु योन्जनले जानकारी दिए ।
धरानमा अघिल्लो वर्ष डेंगुको महामारी भयावह बनेको थियो । अघिल्लो वर्ष हजारौ डेंगु संक्रमित भएका थिए । डेंगुका कारण धरान १५ का मनु सुनुवार, धरान ५ का कुसुम लकान्द्री र एक जना विद्यार्थीलगायतको मृत्यु भएको थियो ।
एडिज एजिप्टाई जातको पोथी लामखुट्टेको टोकाइबाट हुने डेंगु ज्वरो धरानमा देखा परेको प्रशासक इन्दुको भनाइ छ ।

डेंगु के हो ?
चिकित्सकका अनुसार एडिस जातिका (एजिप्टाइ र अल्बोपिक्टस) पोथी लामखुट्टेको टोकाइबाट संक्रमण हुने भाइरल ज्वरोमध्ये एक डेंगु पनि हो । यसको संक्रमणमा सुरूआती दिनमा ज्वरो आउने, आँखा रातो हुने र दुख्ने, टाउको, पेट, जोर्नी र मांसपेशी दुख्ने, आलस्य हुने जस्ता लक्षणहरू देखा पर्छ । संक्रमितमध्ये केही थोरै भने सिकिस्त पनि हुन सक्छन् । रगतमा पानीको मात्रा कम भई रक्तचाप कम हुन्छ । शरीरमा प्लेटलेटको संख्या कम भएमा रक्तनलीहरूबाट रगत शरीरका अन्य तन्तुमा जाने भएकोले शरीरमा डाबर आउने लक्षण देखा पर्न सक्छ । रक्तचाप निकै कम हुने र शरीरमा आवश्यक रगतको अभावमा बिरामी सिकिस्त भई मृत्युसम्म हुनसक्ने भएकोले बेलामा (सामान्य ज्वरो हुँदा) नै चिकित्सकको निगरानीमा उपचार गराउनु बुद्धिमानी हुनेछ ।