धरानः नेपाल पत्रकार महासंघको संयोजन र धरान उपमहानगरपालिकाको सहयोगमा शुक्रबारबाट तीनदिने विपद् व्यवस्थापन पत्रकारिता तालिम शुरु भएको छ । आगामी आइतबार सम्म हुने उक्त प्रशिक्षणमा धरानका विभिन्न मिडिया हाउसका गरी जम्मा १९ जना सञ्चारकर्मीहरूको सहभागिता रहेको थियो ।
कोविड १९ को महामारीका बेला कसरी आफू सुरक्षित भएर पत्रकारिता गर्ने जानकारीका लागि तालिम गराइएको हो । कार्यक्रममा नेपाल पत्रकार महासंघ सुनसरिका अध्यक्ष अमर खड्काले यस्तो अवसरलाई राम्ररी सदुपयोग गर्न सहभागीहरूलाई शुभकामना समेत दिएका थिए । तालिममा पत्रकार देवेन्द्र कार्की, रोहित राई र धीरेन लिम्बूले सहजीकरण गरेका थिए ।
देवेन्द्रले विपद्का बेला मिडियाको भूमिका र गर्ने कार्यका बारेमा जानकारी गराएका थिए भने रोहितले खोज पत्रकारिताको विषयमा र सोही तालिममा धरान हात्तीसार क्याम्पसका माइक्रोबायोलोजीका विभागका सहप्राध्यापक एवं सञ्चारकर्मी धिरेन लिम्बूले कोभिड १९ भाइरसका बारेमा प्रशिक्षण गराएका थिए ।
कार्यक्रममा प्रमुख अतिथि धरान उपमहानगरपालिकाका सूचना तथा राजश्व शाखा प्रमुख खगेन्द्रप्रसाद खतिवडाले शुभकामना मन्तब्य दिएका थिए । कार्यक्रम सञ्चालन पत्रकार महासंघ सुनसरीका उपाध्यक्ष सन्तोष काफ्लेले गरेका थिए ।