धरानः अन्तरजातीय विवाहको निहुँमा दलित युवाको हत्या गरेको विरोधमा धरानमा सिटी जुलुस प्रदर्शन भएको छ ।
भानुचोकस्थित लोकतान्त्रिक चौतारीमा तीन मिनेट सिटी फुकेर प्रदर्शन भएपछि विभिन्न वक्ताहरूले हत्याको विरोध गर्दै कारवाहीको माग पनि गरे ।
प्लेकार्ड बोकेका प्रदर्शनकारीहरूले दोषीलाई कडा कारबाही गर्न र राजनीतिक आडमा घटनालाई नछाड्न माग गरेका छन् । कोणसभामा बोल्ने वक्ताले घटनामा सरकारले निष्पक्षरूपमा छानबिन गर्नुपर्ने र पीडितलाई न्याय दिलाउन माग गरे ।
केही हप्ताअघि पश्चिम रुकुमको चौरजहारीमा जाजरकोटको भेरी नगरपालिका–४, रानागाउँका नवराज विकको हत्या भएको थियो । प्रेम सम्बन्धमा रहेकी प्रेमिकासँग बिहे गर्न गएका बेला विकको हत्या भएको बताइएको छ । अन्य विभिन्न संघ–संस्थाहरूले पनि गम्भीर अमानवीय घटना भएको भन्दै दोषीमाथि कारबाही गर्न सरकारको ध्यानाकर्षण गराएका छन् । सोती पुगेका युवकहरूलाई गाउँलेले लखेटेपछि ज्यान जोगाउन ६ जना भेरी नदीमा हामफालेका थिए ।