धरानः लकडाउन अर्थात् कोरोनाका कारण बालबालिकाको औषधि खुवाउने र खोप सेवा प्रभावित भएको थियो । गत वैशाख ६ र ७ गते नै भिटामिन ‘ए’ खुवाउने भनेपनि त्यतिबेला लकडाउन थियो । नखुवाउँदा शिशु र बालबालिकामा विभिन्न प्रकारका रोग फैलिने डर बढेको थियो ।
देशभरका खोप लगाइने र औषधि खुवाउने कार्यक्रम प्रभावित हुँदा बाल मृत्युदर बढ्ने खतरा समेत बढेको विज्ञले बताउँदै आएका थिए । जन्मदेखि १५ महिनासम्मका बालबालिकालाई नियमितरूपमा लगाइने विभिन्न प्रकारका खोप र औषधि समयमै नलगाउँदा अथवा नखुवाउँदा लाखौं बालबालिका प्रभावित भएका थिए । लकडाउन खुकुलो भएपछि खोप केन्द्रबाट सेवा शुरू भएको हो । लकडाउनपछि झण्डै तीन महिना देशभर खोप सेवा पूर्ण रुपमा ठप्प बन्यो ।
स्वास्थ्य क्षेत्रको ठूलो चुनौतीको रुपमा देखापरेको कोरोनाको सामना गर्नु महत्वपूर्ण भएजस्तै खोप लगाउनुपर्ने बालबालिकालाई समयमै खोप लगाएर बाल स्वास्थ्यमा निम्तिन सक्ने समस्या रोक्नु पनि त्यत्तिकै महत्वपूर्ण नै हो । धरानमा पनि भिटामिन ए र जुकाको औषधि खुवाइयो । खोप केन्द्र सञ्चालन भएपछि धरानमा अभिभावक बालबालिका लिएर खोप केन्द्रसम्म पुगे । पहिलो दिन धरान–१६ स्थित वडा कार्यालयमा भिटामिन ए र औषधि खुवाइयो, त्यहाँ पुग्दा अधिकांश अभिभावक र बालबालिकालाई मास्क लगाएर थिए । कोही कोही अभिभावक र बालबालिकाले भने मास्क लगाएको देखिएन । हेरौं फोटोः
फोटोः हाम्रो कोशी आवाज डटकम