धरानः धरानस्थित बीपी कोइराला स्वास्थ्य विज्ञान प्रतिष्ठानबाट स्व. बीपी कोइरालाको तस्वीर हटेपछि नेपाल तरुण दलले धरान उपमहानगर समितिले आपत्ति जनाएको छ ।
धरानको उपकुलपति बनेर आएका डा. ज्ञानेन्द्र गिरीले स्व. बीपी कोइरालाको नाममा स्थापना भएको बीपी कोइराला स्वास्थ्य विज्ञान प्रतिष्ठानको उपकुलपति भएर आएपछि राखिएको ठाउँबाट तस्वीर हटाएका थिए । यसअघि जति जना उपकुलपति भएपनि त्यो तस्वीर कहिल्यै हटेको थिएन ।
तरुण दल नगर उपमहानगर समितिले तस्वीर हटाएको चाल पाएपछि यथास्थितिमा राख्न सुझाएर फर्किएको र सोही स्थानमा नै अहिले राखिएको नगर अध्यक्ष हिमाल श्रेष्ठले जानकारी दिए । तरुण दलको अगुवाईमा क्षेत्रीय समिति, नेविसंघलगायतको टोली पुगेर उपकुलपतिलाई भेटेको उनले बताए । अहिले सोही स्थानमा बीपीको तस्वीर छ ।
‘कार्यालयभित्र स्थापनाकालदेखि नै बीपी कोइरालाको तस्वीर त्यही थियो, यसअघि टवाइलेटको ढोकामाथि तस्वीर सारेको भन्ने जानकारी पाएका थियौं, साहै अपमानित भएको महसुस गरयौं र डेलिगेसन गयौं तर अहिले जहाँको त्यही त्यो तस्वीर छँदैछ ।’ उनले भने । यसअघि कांग्रेसले पनि यस विषयमा आपत्ति जनाइसकेको छ । कांग्रेसमात्रै होइन बीपीको तस्वीर हटेपछि त्यहाँ कार्यरत कर्मचारी पनि रुष्ट थिए ।
उनी सहकुलपतिसमेत रहेका स्वास्थ्य तथा जनसंख्यामन्त्री भानुभक्त ढकालको सिफारिसमा कुलपति बनेर धरान आएका हुन् । उता तरुण दल केन्द्रीय समितिले पनि यस्तो विज्ञप्ति जारी गरेको थियो ।