धरानः धरान–१२ स्थित पब्लिक हाइस्कुलको मुहार अझै फेरिने भएको छ । नमूना विद्यालय बनेको पब्लिक हाइस्कूलमा भौतिक पूर्वाधारसम्बन्धी गुरुयोजना बन्ने र सुविधा सम्पन्न विद्यालय भवनको डीपीआर तयार हुने भएको छ ।
नमुना विद्यालय विकास एव्म सञ्चालन निर्देशिका २०७४ अनुरुप शिक्षा तथा प्रविधी मन्त्रालयको निर्णयअनुसार यो विद्यालय नमूना विद्यालयको रुपमा छनौट भएको हो । विद्यालयको पूर्वाधार विकास निर्माण मन्त्रालयले प्रविधिक खटाई विद्यालयको भौतिक विकास निर्माण सम्बन्धी गुरुयोजना र सुविधा सम्पन्न भवनको डीपीआर तयार गर्न प्रविधिक पक्षमा सहयोग गर्न लागेको हो ।
विद्यालयलाई एक वर्षअघि नै नमूना विद्यालयको रुपमा विकास गर्न छनौट गरिएको थियो । सरकारले नमूना विद्यालयका लागि ५ वर्षसम्म प्रत्येक वर्ष आर्थिक सहयोग उपलब्ध गराउनेछ । ढिलो भएपनि काम शुरु हुन लागेकोमा विद्यालयका प्रधानाध्यापक इन्द्रमोहन झाले खुशी व्यक्त गरेका छन् । यसअघि छनौट भएका विद्यालयहरुलाई नमूना विद्यालय बनाउन उपलब्ध भएको अनुदान रकम भौतिक, शैक्षिक एवं व्यवस्थापनमा गरिने आफूलाई जानकारी भएको प्र.अ. झाले बताए ।
मंगलबार विद्यालय व्यवस्थापन समितिको वैठकमा विद्यालयको आवश्यकता अनुरुपको योजना निर्माण गर्ने सम्बन्धमा गोष्ठी भएको थियो । आधुनिक प्रविधिको उपयोग गर्न सकिने किसिमले भौतिक पूर्वाधार निर्माण गर्ने गरीको योजना निर्माण गर्ने योजना बनाइने व्यवस्थापन समितिका अध्यक्ष हरिबहादुर कार्कीले बताए ।
विद्यालयमा कक्षा कोठाको अभाव भएकाले सुविधा सम्पन्न कक्षाकोठा सहितको नयाँ विद्यालय भवन निर्माण गर्ने विद्यायमा छलफल भएको थियो । पब्लिक हाइस्कूल २००३ सालमा स्थापना भएको धरानको पहिलो सामुदायिक विद्यालय हो ।
भेलामा धरान उपमहानगरपालिका, वडा नं. १२ का वडाध्यक्ष टंकबहादुर राई, वडा सदस्य ब्रम्हज्ञ भट्टराई, पब्लिक हाइस्कूल एल्मोनाई २०३१ का सचिव विरेन्द्र सिंह थापा, सल्लाहकार मोहन श्रेष्ठ शिक्षक प्रतिनिधि र सरकारबाट निरुपित गरिएको सितारा कन्सल्टेन्सी ललितपुरका प्रतिनिधिहरु विद्यालय व्यवस्थापन समिति र शिक्षक अभिभावक संघका प्रतिनिधि लगायतको उपस्थिति रहेको थियो ।
फोटोः मोहन श्रेष्ठ