धरानः धरानमा अन्तर्राष्ट्रियस्तरको क्रिकेट स्टेडियम बन्दैछ । हाल घेराबारा लगाइसकिएको छ । यसको संरचना कस्तो होला भन्ने अहिले धरानलगायत देशविदेशसम्म चर्चा छ । स्टेडियमसहित स्वीमिङ पुललगायत अन्य खेलकुदका गतिविधि हुने खाल भौतिक संरचना निर्माण गर्ने लक्ष्य लिइएको क्रिकेट मैदान संरक्षण समितिका संयोजक एवं नेकपा नेता अइन्द्रविक्रम बेघा बताउँछन् । संयोजक बेघाका अनुसार यो प्रदेशकै खेलकुदका लागि यो महत्वपूर्ण संरचना बन्नेछ ।
धरान–१५ स्थित खोरिया वस्तीमा बनेको स्टेडियमको ‘भक्तराज कन्दङ्वा स्मृति क्रिकेट स्टेडियम’ नाम दिइएको छ । शुरूमा अर्थमन्त्रालयबाट १ लाख, त्यसपछि ५० लाख रूपैयाँबाट बनाउन शुरू गरिएको स्टेडियममा अहिलेसम्म करिब दुई करोड खर्च भइसकेको उनले बताए ।
‘पहिला जंगल थियो, जंगलमा रहेकोले मैदान निर्माणमै निकै खर्च भयो’, उनले थपे, ‘हालसम्म दुई करोड रुपैयाँ खर्च भइसकेको छ ।’ प्रदेश सरकारले १ करोड रूपैयाँ बजेट विनियोजन गरेपछि मैदानमा ड्रेन निर्माण, फेन्सिङ, माटो कटिङ लगायतको काम सकिएको छ ।
संयोजक बेघाका अनुसार मैदानको डिपिआर पनि निर्माणको चरणमा छ । ‘धरानमै अन्तर्राष्ट्रियस्तरको क्रिकेट मैदानको परिकल्पना गरिएको हो । त्यहीअनुसार काम पनि भइरहेको छ’, उनले भने । अहिले घेराबारा, मैदान क्लियर गर्ने, लेभलिङ गर्ने सम्पन्न भइसकेको छ । यो ठूलो परियोजना र बहुवर्षीय योजना भएकाले अझै स्वीमिङ पुल, प्याराफिटलगायत अन्य खेलकुदका गतिविधि हुने खाल भौतिक संरचना निर्माण गर्न सकिने उनले बताए ।
निर्माण समितिका अध्यक्ष श्रीप्रसाद बेघाले यो खेल मैदान २ सय मिटर लम्बाई र २ सय मिटर चौडाई क्षेत्रफलमा रहेको बताए । धरान उपमहानगरपालिकाका इन्जिनियर सुरज श्रेष्ठले अनुसार क्रिकेट मैदानको डिपिआर तयार भइरहेको बताए । डिपिआरबिनै पनि विज्ञसँग आवश्यक सल्लाह लिएर निर्माण कार्य थालिएको उनले बताए । उनले डिपिआर लकडाउनले रोकिएको पनि बताए ।
हेरौं भिडियो, फोटोः