धरानः अन्ततः धरानमा सातदिनको लागि लकडाउन थपिएको छ ।
आज २८ गते रातिदेखि धरानमा जारी गरिएको लकडाउन सकिँदैछ । धरान उपमहानगरपालिकामा आज (बुधबार) बसेको कार्यपालिकाको बैठकले सो निर्णय गरेको हो ।
धरान उपमहानगरपालिकाका मेयर तिलक राईले सातदिनसम्म लकडाउन थपिएको बताए । ‘लगातार संक्रमित बढिरहेका छन्’, उनले भने, ‘आज कार्यपालिकाको बैठकले सात दिन लकडाउन थप्ने निर्णय गरेको हो ।’
सातादिन भनेको भदौ ३ गतेसम्म हो । धरान–९ का वडाध्यक्ष रत्न कटुवालले ७ दिनको लागि लकडाउन थपिएको बताए । उनले धराने जनतालाई तरकारी र दूध खुवाउने समेत निर्णय भएको बताए । उनले स्थानीय उत्पादनलाई छुट दिने निर्णय भएको बताए । ‘बाहिरबाट धरानमा तरकारी र दूध ल्याउन नदिने निर्णय भएको र स्थानीयस्तरमा उत्पादन भएका तरकारी, दूध नरोक्ने निर्णय भएको छ ।’ उनले भने ।
यस्तै, कृषि बजारमा मौज्दात रहेका तरकारी सुपथ मूल्यमा दिइने निर्णय भएको उनले जानकारी दिए । उनले उपमहानगरपालिकाभित्रै रहेको बीपी कोइराला स्वास्थ्य विज्ञान प्रतिष्ठानले कोरोना संक्रमितलाई बेड अभावको कारण भर्ना गर्न समन्वय नगरेको र उपमहानगरपालिकाले हरियाली सामुदायिक वनमा २३ बेडको कोरोना संक्रमितलाई राख्ने आइसोलेसन सञ्चालन गर्ने निर्णय पनि गरेको जानकारी दिए । उता जिल्ला प्रशासन कार्यालय सुनसरीले पनि साउन ३२ गतेसम्म निषेधाज्ञा जारी नै गरिसकेको छ ।