बेलबारीः मोरङको बेलबारीमा अनौठो खालको बलात्कार घटना सार्वजनिक भएको छ ।
बेलबारी नगरपालिका ११ कि १६ वर्षीया दलित बालिकामाथि तीन बालक र एक बयस्क व्यक्तिले सामूहिक बलात्कार गरेका प्रहरीले जनाएको छ । इलाका प्रहरी कार्यालय बेलबारीका प्रहरी निरीक्षक ऋषिराज ढकालले जंगलमा निगुरो टिप्न पुगेकी १६ वर्षीया बालिकामाथि सुरुमा तीन बालक र पछि गाउँकै ४० वर्षीय होम तामाङले बलात्कार गरेको जानकारी दिए ।
गत मंगलबार दिउँसो निगुँरो टिप्न गएकी बालिकामाथि बलात्कार गर्ने तामाङ उनी बालिकाले चिनेजानेकै व्यक्ति भएका इन्सपेक्टर ढकालले बताए । उनले बालकलाई प्रयोग गर्दा आफू घटनाबाट बच्ने भएकाले तामाङले त्यस्तो उपाय लगाएको हुन सक्ने बताए ।
१२, १३ र १४ वर्षका बालकलाई लिएर किशोरी निगुँरो टिप्न जंगल गएको बेला घटना भएको पाइएको उनले जानकारी दिए । प्रहरीका अनुसार सुरुमा विभिन्न डरत्रास देखाउँदै तामाङले ती किशोरी र बालकलाई नियन्त्रणमा लिए । पहिला तीन बालकलाई पालैपालो बालिकामाथि बलात्कार गर्न लगाए । पछि तामाङ आफूले पनि बलात्कार गरेको बयान बालकहरुले प्रहरीलाई दिएका छन् । बालिकाको स्वास्थ्य परीक्षणबाट पनि बलात्कार पुष्टि भएको प्रहरीले जनाएको छ ।