धरानः किड्नी फेल भएको भन्दै स्थानीयसँग चन्दा संकलन गर्ने तीनजना पक्राउ परेका छन् ।
सुनसरीको इटहरी उपमहानगरपालिका–२ देवीथान क्षेत्रमा छोराको किड्नी फेल भएको भन्दै स्थानीयसँग चन्दा संकलन गरिरहेको अवस्थामा प्रहरीले तीनजनालाई पक्राउ गरेको छ ।
पक्राउ पर्नेमा सुनसरीको धरान–१६ स्थित गैरीगाउँका २१ वर्षीय अमन मगर, भोजपुरको कटुन्जे–९ घर भई धरान–१६, गैरीगाउँ बस्ने २५ वर्षीय मदन खत्री र झापाको खुदनाबारी घर भएका ललित गिरी रहेको इलाका प्रहरी कार्यालय इटहरीका प्रहरी निरीक्षक रमेशकुमार बस्नेतले बताए ।
पटक–पटक विभिन्न बहानामा अमन मगर, मदन खत्री, र ललित गिरीले पैसा माग्ने गरेको भन्दै स्थानीयले आजित भएर बुधबार प्रहरीलाई खबर गरेका थिए । खबरसँगै इलाका प्रहरी कार्यालय इटहरीबाट खटिएका प्रहरीले उनीहरुको शंकास्पद गतिविधि अनुसन्धान गरेका थिए । प्रहरीको टोलीले तीनै जनाले झुठो बहानामा आर्थिक सहयोग मागी ठगी गर्न खोजिरहेको अवस्थामा नियन्त्रणमा लिएको प्रहरी कार्यालयका प्रहरी निरीक्षक बस्नेतले जानकारी दिए ।
बिरामीको बाहानामा स्थानीयलाई हैरानी दिएपछि प्रहरीले पक्राउ गरेको प्रहरी निरीक्षक बस्नेतले जानकारी दिए । प्रहरीले तीनै जनामाथि आवश्यक कानुनी कारबाही र अनुसन्धान भइरहेको इलाका प्रहरी कार्यालय इटहरीले जनाएको छ ।