सुनसरीः सुनसरीको इनरुवा–३ स्थित राजमार्ग एरियाबाट प्रतिबन्धित लागूऔषधसहित दुईजना पक्राउ परेका छन् ।
पक्राउ पर्नेमा सुनसरी दुहवी–१० का २६ वर्षीय दीपककुमार यादव र हरिनगर–६ का ३४ वर्षीय सहिद मियाँ रहेका छन् । पक्राउ परेका दुवैजनाले राजमार्ग छेउको झाडीमा लागूऔषध लुकाइछिपाइ राखिरहेको भन्ने सूचनाका आधारमा तत्काल जिल्ला प्रहरी कार्यालय सुनसरीबाट खटिएको प्रहरी टोलीले उनीहरूलाई नियन्त्रणमा लिएको हो ।
नियन्त्रणपश्चात् उनीहरूले लुकाउँदै गरेको बोरा चेकजाँच गर्दा १४० बोतल डाइलेक्स डिसी, ३९६० क्याप्सुल स्पास्मो प्रोक्जोभन प्लस र १३५० नित्राभेट ट्याब्लेट फेला पारी बरामद गरिएको जिल्ला प्रहरी कार्यालय सुनसरीका डिएसपी विनोद शर्माले जानकारी दिए ।
यसैगरी सुनसरीकै कोशी गाउँपालिका–३ नहरचोकबाट २८ वर्षीय कमरुदिन मियाँ लागूऔषधसहित पक्राउ परेका छन् । विशेष सुराकका आधारमा उनलाई शनिबार साढे १० बजे पक्राउ गरिएको जिल्ला प्रहरी कार्यालय सुनसरीले जनाएको छ ।
मियाँलाई पक्राउ गरिएसँगै उनले बोकेको झोला खोलेर चेकजाँच गर्दा ४५ बोतल डाइलेक्स डिसी र ३२८ क्याप्सुल स्पास्मो प्रोक्जोभिन प्लस फेला बारी बरामद गरिएको हो । यसरी लागूऔषधसहित पक्राउ परेका तिनै जना उपर थप अनुसन्धान तथा कानुनी कारबाही अगाडि बढाइएको जिल्ला प्रहरी कार्यालय सुनसरीले जनाएको छ ।